Atyraudaǧy mal bazarynda ölgen siyrdan sıbır jarasy anyqtaldy

Atyraudaǧy tört tülık satatyn bes bazardyŋ bırınde ölgen siyrdan sıbır jarasy anyqtaldy, dep habarlaidy "Adyrna" ūlttyq portaly. Äleumettık jelıde taraǧan aqparatqa säikes, 12 qaraşada bazar qyzmetkerı siyrdyŋ ölıp jatqanyn baiqaǧan. Keiın anyqtalǧandai, būl mal Batys Qazaqstan oblysynan äkelıngen. Veterinariialyq baqylau jäne qadaǧalau komitetı Atyrau oblystyq aumaqtyq inspeksiiasy basşysynyŋ uaqytşa mındetın atqaruşy Nūrken Baiarovtyŋ mälımdeuınşe, bazar jabylyp, ondaǧy maldarǧa tolyqtai vaksinasiia jasalyp, 14 kün baqylauǧa alynatyn bolady. Qala karantinge jabylmaidy. Sebebı, basqa aimaqtarda mūndai auru tırkelmegen. Bügın ölgen siyrdan sıbır jarasy anyqtalǧany rastaldy. Mamandar bazardaǧy barlyq mal ielerın tekserudı bastady. Qazırgı uaqytta bazarda 56 siyr, 79 qoi jäne 7 jylqy bar. Sonymen qatar, qaladaǧy basqa mal bazarlarynda da qosymşa tekseruler jürgızu josparlanyp otyr.