Ūlttyq qauıpsızdık komitetı üş oblystaǧy qylmystyq-atqaru jüiesı mekemelerınde 10 radikaldy dıni ideologiia jaqtasynyŋ zaŋsyz äreketınıŋ jolyn kestı. Būl turaly bügın ŪQK baspasöz qyzmetı jazdy, dep habarlaidy «Adyrna» tılşısı.
Belgılı bolǧandai, qamauda otyrǧan figuranttardyŋ bırı terrakt jasauǧa daiyndalǧan, al qalǧandary terrorizmdı nasihattauǧa qatysyp, terrorlyq äreketterdı ūiymdastyru maqsatynda adamdardy öz qatarlaryna tartumen ainalysqan.
«Jaza öteu oryndarynda jürgızılgen tıntuler barysynda suyq qaru, smartfondar jäne basqa da zattai dälelder alyndy. Bıreuınıŋ ekstremizm üşın sottylyǧy bar. Qalǧandary kısı öltıru, tonau jäne ūrlyq üşın jazalaryn ötegen. Sondai-aq, Almaty qalasynda probasiialyq baqylauda tūrǧan olardyŋ bailanysy ūstaldy»,—delıngen habarlamada.
Komitettıŋ baspasöz qyzmetınıŋ mälımetınşe, joǧaryda atalǧan adamdarǧa qatysty Qylmystyq kodekstıŋ 255, 256 jäne 259-baptary boiynşa sotqa deiıngı tergep-tekseru jürgızılude. Qylmystyq-prosestık kodekstıŋ 201-babynyŋ 1-bölıgıne säikes özge aqparat jariia etılmeidı.
