«Qazaqmys» korporasiiasynyŋ şahterlerı Prezidentke ündeu jasap, qysym körsetılgenın mälımdedı

«Qazaqmys» korporasiiasynyŋ şahterlerı öz talaptaryn jetkızu üşın prezident Qasym-Jomart Toqaevqa beineündeu jasady, dep habarlaidy "Adyrna" ūlttyq portaly QazTAG-qa sıltep.

«Bız sızge janaiqaiymyzdy jetkızgımız keledı. Üş kün öttı, bıraq «Qazaqmys» korporasiiasynyŋ basşylyǧy bızdı adam sanamaidy, şahterlermen, jūmysşylarmen sanaspaidy. Bızdıŋ aksiiamyz qalai bastaldy? Būǧan deiın bız jūmysşylar arasynan bastamaşyl top qūrdyq. Būl top halyqtyŋ talap-tılekterın basşylyqqa jetkızudı maqsat ettı, sol üşın jūmysşylar öz ökılderın sailady. Alaida būl ökılderdı ŪQK qyzmetkerlerı qudalap, jalaqyny köteru talabymyz üşın sotqa tartamyz dep qorqytty. Būl ereuıl de, miting te emes, būl – jūmysşylar men jūmys beruşı arasyndaǧy eŋbek dauy», – dedı şahterlerdıŋ ökılı jer astynda tüsırılgen beinejazbada.

Şahterler internette taraǧan jalaqy turaly mälımetterdıŋ şyndyqqa janaspaitynyn aitty.

«İnternette şahterlerdıŋ eŋ tömengı jalaqysy 800 myŋ teŋge degen jalǧan aqparat taratyluda. Soŋǧy üş künde mūnda «Qazaqmys» basşylyǧynyŋ ökılderı, Sätbaev qalasy äkımınıŋ orynbasary, prokuror tüsıp, bızben söilestı. Bız būl kezdesude üş talap qoidyq:

1. ŪQK jäne ışkı ıster organdary tarapynan bastamaşyl top müşelerın qudalaudy toqtatu.
2. 13-şı jalaqyny tolyq kölemde töleu. Qazırgı kezde basşylyq tek bazalyq jalaqyny tölep otyr, al bız tolyq kölemde 13-şı jalaqy talap etemız.
3. Jalaqyny 100%-ǧa arttyru», – dedı şahterler ökılı.

Şahterlerdıŋ aituynşa, alǧaşqy künı kelısımge qol jetkızılmegen. Al ekınşı künı prokuror, äkımdık ökılderı jäne ardagerler şahtaǧa qaita tüsse de, mäsele şeşılmegen.

«Basşylyq bızben söilesuden bas tartuda. Bız jalaqyny 100%-ǧa arttyru talabymyzdy qaita qarap, 300 myŋ teŋge qosymşa töleudı jäne toqsan saiyn 50 AEK kölemınde syiaqy berudı talap etemız. Sondai-aq 13-şı jalaqyny tolyq kölemde töleuımızdı sūraimyz. Būl videoündeudı şyndyqty jetkızu üşın jasap otyrmyz. Bız qoǧamdyq tärtıptı būzbaimyz, zaŋsyz äreket jasamaimyz. Tek talaptarymyzdyŋ oryndaluyn sūraimyz», – dep mälımdedı şahterler.

17 jeltoqsannan bastalǧan ereuılge basqa aimaqtardaǧy şahterler de qoldau körsettı. 20 jeltoqsanda Jambyl oblysyndaǧy taǧy bır kenışte kelısımge qol jetkızılgenı turaly habarlandy. Degenmen, Ūlytau oblysyndaǧy şahtaǧa polisiianyŋ arnaiy jasaǧy kırgenı jaily aqparat tarady.