Elımızde käsıpkerlıktı damytu boiynşa auqymdy jūmystar atqarylyp jatyr. Onyŋ ışınde jastardyŋ öz käsıbın aşyp, tabys tabuy öte maŋyzdy bolyp otyr.
Osy maqsatta Taraz qalasynda «Basta» biznes-forumy ötıp, män-maǧynasy zor ıs-şara ūiymdastyryldy. Naqtyraq aitsaq, bolaşaq käsıpkerler elımızdegı belgılı jas käsıpkerlermen kezdesıp, özderınıŋ tolǧandyryp jüpgen sūraqtaryna jauap aldy.
Atalmyş forumǧa «Jas käsıpker» jobasynyŋ alǧaşqy tülekterı qatysyp, öz biznesın aşudy armandaityn jastarǧa aqyl-keŋesterın aitty. Olar biyl bastalǧan «jas käsıpker» jobasynyŋ mol mümkındık bergenın jetkızdı.
«Bügıngı künı «Jas käsıpker» jobasy boiynşa tyŋdauşylardyŋ ekınşı legın oqytu aiaqtaldy. Barlyǧy 1000 adamdy qamtu josparlanuda. Oblys boiynşa 10 oqu synyby jūmys ısteidı. Oqudy aiaqtaǧannan keiın jastar öz biznesınıŋ basynda granttar nemese jeŋıldıktı nesieler ala alady. Bügıngı forumdy bız «Jas käsıpker» jobasynyŋ tülekterın tek öŋırdıŋ ǧana emes, elımızdıŋ de jūmys ıstep tūrǧan käsıpkerlerımen kezdesu maqsatynda ūiymdastyrdyq», – deidı oblystyq Käsıpkerler palatasynyŋ mamandary.
«BASTA» forumy alaŋynda erkın formatta qatysuşylar jūmys ıstep tūrǧan käsıpkerlerdıŋ tarihyn tyŋdap, spikerlerge tıkelei özderın qyzyqtyratyn sūraqtaryn joldady. Spikerler qatarynda käsıbi jauynger, Alem fighters sport kluby jelısınıŋ iesı, «Ardaq Nazarov» qorynyŋ qūruşysy Ardaq Nazarov, «Astana park» kinoteatrynyŋ negızın qalauşy Oljas Quandyqov, «Etky»kompaniiasynyŋ iesı Jandos Ahmetov bar. Olar öz biznesın qalai bastaǧany, qandai qatelıkter jıberılgenı jäne olardy qalai tüzetılgenı turaly aitty.
«Bizneste tabandylyq, şydamdylyq qajet. Ärdaiym täuekel etıp, kez-kelgen kedergıge daiyn bolu kerek. Qatelıkter men kedergılerdı synaq retınde qabyldap, şegınuge jol bermeu tyrysqan abzal. Öitkenı, barlyq synaqtardan ötıp, tabysqa jetken soŋ, sız Jeŋıstıŋ şynaiy dämın sezınesız. Men «Jas käsıpker» siiaqty auqymdy jobanyŋ bır bölıgı bolyp tabylǧanyma öte quanyştymyn. Būl joba jastardyŋ tabysty bolaşaǧynyŋ kepılı. «Jas käsıpker« jobasy köptegen bolaşaq käsıpkerler üşın tabysqa jetudıŋ bastamasy bolady dep senemın», – dedı Ardaq Nazarov.
Spikerlerge sūraqtar joldaǧandardyŋ denı käsıptı kapitalsyz qalai bastauǧa bolatynyn, qandai salada käsıpkerlıkpen ainalysqannyŋ dūrystyǧyn jäne jas biznesmenderge memleket qandai qoldau körsetude ekendıgın sūrap, naqty jauaptar aldy.
«ADYRNA»
ūlttyq portaly
