Mümkındıgı şekteulı azamattardy jūmysqa ornalastyryp, olardy qoǧamnyŋ bır ökılı retınde sezındıru üşın memleket auqymdy şaralardy jüzege asyryp jatyr. Ökınışke qarai eŋbek önımdılıgı tömen degen jeleumen köptegen mekeme jarymjan azamattardy jūmysqa alyp, qoldau körsetuden qaşady.
Äitse de, Jambyl oblysynda «Nur Otan» partiiasy oblystyq filialynyŋ ūiymdastyruymen «Kedergısız keleşek» jobasy aiasynda mümkındıgı şekteulı jandarǧa arnalǧan bos jūmys oryndary järmeŋkesı öttı. Bos jūmys oryndary järmeŋkesınde 24 jūmys beruşı mekemeden 70 mamandyq boiynşa 166 jūmys orny ūsynyldy.
«Nūr Otan» partiiasynyŋ oblystyq filialy töraǧasynyŋ orynbasary Şäbden Tıleumūrattyŋ aituynşa, «Kedergısız keleşek» jobasynyŋ maŋyzy zor.
«Kedergısız keleşek» jobasyn ıske asyru Elbasy, partiia töraǧasy Nūrsūltan Nazarbaevtyŋ tapsyrmalary arqyly jüzege asyp jatyr. Atalǧan joba mümkındıgı şekteulı jandardyŋ ömır süru sapasyn arttyruda memlekettık uäkılettı organdar men ükımettık emes ūiymdardyŋ küşın bırıktıruge mümkındık beredı. Soŋǧy üş jylda partiianyŋ qoǧamdyq qabyldauyna 187 mümkındıgı şekteulı jan ötınışpen kelıp, bügıngı künı 66 adamnyŋ mäselesı oŋ şeşımın tapty. Tüsken ötınışterdıŋ basym bölıgı – mümkındıgı şekteulı jandardy jūmysqa ornalastyru, materialdyq kömek beru, tūrǧyn üi mäselesı bolyp otyr. Osy mäselelerdı eskere kele partiianyŋ oblystyq jäne aumaqtyq filialdary «Kedergısız keleşek» partiialyq jobasyn jüzege asyru maqsatynda jyl saiyn mümkındıgı şekteulı jandarǧa arnalǧan bos jūmys oryndarynyŋ järmeŋkesın ūiymdastyrady. Biyl būl järmeŋke ekınşı ret ötude. Soŋǧy üş jylda mümkındıgı şekteulı jandarǧa arnalǧan bos jūmys oryndary järmeŋkesınıŋ qorytyndysy boiynşa 400-ge juyq mügedek jan jūmysqa ornalasqan», – dedı Ş.Tıleumūrat.
Bügınde Jambyl oblysy boiynşa 45 326 mümkındıgı şekteulı azamat bar bolsa, onyŋ ışınde 1-şı toptaǧylar — 4164, 2-şı toptaǧylar — 18535, 3 toptaǧylar — 16342 adam. Olardyŋ 6285-ı 18 jasqa tolmaǧandar. Aǧymdaǧy jyly mümkındıgı şekteulı azamattardy oŋaltu maqsatynda oblystyq biudjetten 764,1 million teŋge qarjy bölıngen.
«ADYRNA»
ūlttyq portaly
