179 adam qaza tapqan. Oŋtüstık Koreiada 7 kündık ūlttyq aza tūtu künı jariialandy

Oŋtüstık Koreianyŋ Muan qalasynda 29 jeltoqsan künı taŋerteŋ qonuǧa bet alǧan jolauşylar ūşaǧynyŋ apatqa ūşyrauy saldarynan qaza tapqan 179 adamnyŋ barlyǧynyŋ denesı tabyldy, dep habarlaidy "Adyrna" ūlttyq portaly Yonhap agenttıgıne sılteme jasap. "29 jeltoqsan künı saǧat 21:07-de (Astana uaqytymen 17:07) Jeju Air äue kompaniiasynyŋ äue apaty saldarynan qaza tapqandar sany 179 adamǧa jettı", – delıngen ūlttyq ört söndıru qyzmetınıŋ mälımetterıne süiengen agenttık habarlamasynda. Yonhap agenttıgınıŋ mälımetınşe, būl äue apaty Oŋtüstık Koreia tarihyndaǧy eŋ köp adam şyǧyny bolǧan oqiǧa bolyp otyr. Oŋtüstık Koreia prezidentınıŋ mındetın atqaruşy Chhve San Mok 29 jeltoqsannan 4 qaŋtarǧa deiın jetı kündık ūlttyq aza tūtu künderın jariialady. Ūşaq apatynyŋ sebepterı älı anyq emes, basty boljamdardyŋ qatarynda qūstarmen soqtyǧysu, qozǧaltqyş pen şassidıŋ aqaulary, tejegış jüiesınıŋ ısten şyǧuy jäne ūşu-qonu jolaǧynyŋ jetkılıksız ūzyndyǧy atalyp otyr. Ūşaq qonuǧa ekı ret äreket jasaǧan. Alǧaşqy sätsız äreketke şassidıŋ nemese qozǧaltqyştyŋ aqauy sebep boluy mümkın. Keiın ūşaq korpusyna qonuǧa tyrysqan. Bıraq onyŋ aldyŋǧy bölıgı köterıŋkı qalypta bolyp, ūşu-qonu jolaǧynda joǧary jyldamdyqpen qozǧalǧan. Beinejazbalardan ūşaqtyŋ ūşu-qonu jolaǧynda jyldamdyǧyn bäseŋdete almaǧany jäne onyŋ aldyŋǧy bölıgı joǧary qalypta tūryp, aqyrynda bögetke soqtyǧysqany körınedı. Eske sala keteiık, 29 jeltoqsan künı Oŋtüstık Koreianyŋ Muan qalasyndaǧy äuejaiǧa qonu kezınde Bangkok–Muan baǧyty boiynşa ūşqan Jeju Air äue kompaniiasynyŋ Boeing 737-800 ūşaǧy apatqa ūşyrady. Äue apaty jergılıktı uaqyt boiynşa taŋǧy saǧat 9:07-de oryn aldy. Ūşaq ūşu-qonu jolaǧynan ötıp ketıp, qorşauǧa soǧylyp, ört şyqqan. Ūşaq bortynda 181 adam bolǧan. Olardyŋ ekeuı aman qaldy – bır äiel jäne bır er adam. Ekeuı de ekipaj müşelerı. Olar ortaşa jäne auyr jaraqat alǧan, qazır auruhanaǧa jetkızıldı.  Ūşaq jolauşylarynyŋ arasynda qazaqstandyqtar bolmaǧan.