AQŞ prezidentı Donald Tramp seisenbı künı Resei Ukrainaǧa qarsy soǧysty toqtatu turaly kelıssözder bastamasa, jaŋa sanksiialar engızu "yqtimal" ekenın mälımdedı, dep habarlaidy "Adyrna" ūlttyq portaly.
Tramp AQŞ-tyŋ Ukrainaǧa qaru-jaraq jetkızudı jalǧastyratyny turaly naqty jauap bermedı.
"Bız Zelenskiimen söilestık. Resei prezidentı Vladimir Putinmen de jaqyn arada söilesemız. Sodan keiın jaǧdaidyŋ qalai örbitının köremız. Bız mūny mūqiiat qadaǧalaimyz", – dep jazdy Tramp Truth Social paraqşasynda.
Ol eger 2022 jyly bilıkte özı bolǧanda, Ukrainadaǧy soǧys eşqaşan bastalmas edı dep esepteitının bıldırdı.
"Resei Ukrainaǧa eşqaşan basyp kırmes edı. Menıŋ Putinmen öte myqty kelısımım boldy, būl eşqaşan bolmas edı. Ol Baidendı syilamaidy. Ol aqyldy, bärın tüsınedı", – dedı
Tramptyŋ aituynşa, Ukraina prezidentı Vladimir Zelenskii beibıtşılık ornatqysy keletının aiqyn bıldırgen, bıraq beibıtşılık üşın ekı taraptyŋ da kelısımı qajet.
"Prezident Zelenskii maǧan beibıtşılıktı qalaitynyn anyq aitty. Bıraq beibıtşılıktı ornatu üşın ekı jaqtyŋ da kelısımı qajet. Ne bolatynyn köreiık. Qaşan bolsyn, men kezdesuge daiynmyn. Mūnyŋ aiaqtalǧanyn körgım keledı. Milliondaǧan adamdar qaza tabuda... Būl – qatal jaǧdai, äsırese qazır negızınen sarbazdar qaza tabuda. Qala tūrǧyndary arasynda da qūrbandar köp boldy. Joiylǧan audandar, qūlaǧan ǧimarattar – būl öte qaiǧyly körınıs", – dedı ol.
Tramp sonymen qatar soǧys maidanynda adamdardyŋ köptep qaza tauyp jatqanyn aitty.
"Resei şamamen 800 myŋ sarbazyn joǧaltty. Ukraina 600-700 myŋ sarbaz joǧaltty dep oilaimyn, bıraq būl sandar resmi jariialanǧandardan tömen boluy mümkın. Ekı jaqtan da ülken şyǧyn bar", – dedı ol.
Euroodaqtyŋ Ukrainaǧa köbırek qarjy böluı kerek ekenın aitqan Tramp, AQŞ būl mäselede 200 milliard dollardan astam qarajat jūmsaǧanyn jäne būl mäsele Europaǧa köbırek äser etetının atap öttı.
Sondai-aq, Tramp Qytai basşysy Si Szinpinmen äŋgıme barysynda Ukraina mäselesın talqylaǧanyn jäne Qytaidyŋ būl jaǧdaidy retteuge yqpal etuı kerektıgın aitqanyn mälımdedı.
Ūqsas jaŋalyqtar
