Bir jyl ishinde 45 reseılik jýrnalıst qylmystyq jaýapkershilikke tartyldy

881
Adyrna.kz Telegram
foto: Ratel.kz
foto: Ratel.kz

2024 jyly Reseıde 45 jýrnalıst qylmystyq qýdalaýǵa ushyraǵan. Bul kórsetkish 2023 jylmen salystyrǵanda shamamen eki ese ósken. Qylmystyq ister kóbinese "shetel agenti mindetterin oryndamaý" jáne "ásker týraly feıkter taratý" baptary boıynsha qozǵalǵan. Bul týraly «BAQ quqyǵyn qorǵaý ortalyǵynyń» 22 qańtarda jarııalaǵan qorytyndy esebinde kórsetilgen, dep habarlaıdy “Adyrna” ulttyq portaly.

2024 jyly qylmystyq qýdalaýǵa ushyraǵan 45 reseılik jýrnalıstiń arasynda, ásirese, "shetel agenti mindetterin oryndamaý" ( QK 330.1 baby – 16 is), "ásker týraly feıkter taratý" (QK 207.3 baby – 10 is), "ekstremıstik uıymǵa qatysý" (QR QK 282.1 baby – 8 is) jáne "terrorızmdi aqtaý" (QK 205.2 baby – 7 is) baptary boıynsha qozǵalǵan ister basym boldy.

Ótken jyly Reseıde alǵash ret "qalaýsyz uıymdardyń qyzmetin uıymdastyrý" (QK 284.1 baby) boıynsha qylmystyq is qozǵalǵan. Bul is boıynsha "Novaıa gazeta Evropa" bas redaktory Kırıll Martynov aıyptaldy. Sondaı-aq, Reseı bıligi Ýkraına qarýly kúshteriniń Kýrsk oblysyna basyp kirýin baıandaǵan sheteldik jýrnalısterge qatysty keminde 12 qylmystyq is qozǵady (QK 322 baby – Reseıdiń memlekettik shekarasyn zańsyz kesip ótý).

Ótken jyly Reseı soty jýrnalısterge qatysty keminde 27 qylmystyq is boıynsha úkim shyǵardy, onyń 10-y syrttaı shyǵarylǵan. Kóbine ister áskerı "feıkterdi taratý" (QK 207.3 baby) boıynsha qozǵalǵan. Úkim shyǵarylǵandar arasynda The New Yorker avtory Masha Gessen, jazýshy jáne jýrnalıst Mıhaıl Zygar, Republic bas redaktorynyń burynǵy orynbasary Dmıtrıı Kolezev, RusNews jýrnalısti Roman Ivanov, bloger Kamıkadze Dı, "Lıstok" gazeti baspageri Sergeı Mıhaılov bar.

Sheteldik jýrnalıster de sottaldy – The Wall Street Journal tilshisi Evan Gershkovıch jáne "Radıo Svoboda" jýrnalısti Alsý Kýrmasheva. 2024 jyldyń tamyzynda olar Reseı men Batys arasyndaǵy tutqyn almasý aıasynda bosatyldy.

“2024 jyldyń sońyna qaraı Reseıdiń Ádilet mınıstrliginiń reestrinde 688 "shetel agenti" tirkelgen, olardyń 160-y jýrnalıster, 63-i BAQ jáne 43-i blogerler”, dep habarlaıdy quqyq qorǵaýshy uıym. Osy ýaqytta bılik "shetel agentteri" týraly zańdy qataıtýda.

Reseı bıligi "qalaýsyz" uıymdarmen jumys istegeni úshin ákimshilik qýdalaýdy kúsheıtti. "Medıa quqyǵyn qorǵaý ortalyǵynyń" málimetinshe, ótken jyly QK 20.33 baby boıynsha keminde 79 sheshim qabyldanǵan. Eń kóp hattamalar "Medýza" jýrnalısterine, sondaı-aq osy basylymnyń sarapshylary men oqyrmandaryna qatysty jasalǵan. Buǵan deıin "Medıazona" 2024 jyly Reseıdiń sottary "qalaýsyz" BAQ-pen jumys istegeni úshin 81 aıyppul salǵanyn habarlaǵan bolatyn, onyń 45-i "Medýzaǵa" qatysy bar.

Pikirler