Ǧylymi qyzmetkerlerge eŋbekaqy töleu qaǧidalary qaita qaralmaq

Ǧylym jäne joǧary bılım ministrı Saiasat Nūrbek ǧylymi qyzmetkerlerdıŋ eŋbekaqysy töŋıregındegı dauǧa jauap berdı, dep habarlaidy "Adyrna" ūlttyq portaly Kazinform-ǧa sılteme jasap. QR Prezidentı janyndaǧy Ūlttyq ǧylym akademiiasynyŋ Jas ǧalymdar keŋesı 2025 jyldyŋ 5 qaŋtarynda küşıne engen ǧylymi qyzmetkerlerdıŋ eŋbekaqy töleu qaǧidalaryna qarsylyq bıldırdı. Būl turaly ūiym äleumettık jelıde jariialap, jazbaǧa 100-ge juyq pıkır qaldyryldy. Ūlttyq ǧylym akademiiasynyŋ Jas ǧalymdar keŋesınıŋ töraǧasy Maqsat Jabaǧinnıŋ aituynşa, jaŋa qaǧidalar būrynǧy jüiege qaraǧanda tiımsız. Būǧan deiın ǧalymdar granttyq nemese baǧdarlamalyq-nysanaly qarjylandyru aiasynda ǧylymi qyzmetkerlerdıŋ eŋbekaqysyn jobanyŋ ǧylymi jetekşısı özı böletın. Būl täsıl jūmystyŋ kürdelılıgıne, auqymyna jäne ärbır zertteuşınıŋ naqty ülesıne bailanysty jürgızıletın. "Jaŋa qaǧidalar eŋbekaqy mölşerın bıryŋǧai belgıleudı qarastyrady. Būl – otandyq ǧylymdaǧy biurokratiianyŋ artuynyŋ belgısı. Ǧylymǧa qatysty kez kelgen reforma ǧalymdardyŋ özımen aqyldasyp jürgızıluı tiıs", - dedı Maqsat Jabaǧin. Jas ǧalymdar keŋesı ministrlık bekıtken №592 qaǧidalary ǧylym salasyndaǧy eŋ tömengı eŋbekaqy deŋgeiı retınde qabyldanuy qajet dep esepteidı. Alaida, eŋ joǧary eŋbekaqy mölşerıne şekteu qoiylmauy tiıs. Ǧylymi jobalar men baǧdarlamalar jetekşılerı bekıtılgen ǧylymi ötınım biudjetı şeŋberınde eŋ joǧary eŋbekaqy mölşerın özderı anyqtauy kerek. QR Ǧylym jäne joǧary bılım ministrı Saiasat Nūrbek būl mäsele boiynşa pıkır bıldırıp, jaŋa normanyŋ qaita qaralatynyn aitty. "Ötken aptada bız ǧylymi-zertteu instituttarynyŋ basşylarymen, jas ǧalymdarmen bırneşe sessiia ötkızdık. Barlyq ūsynystar jinaldy. Kelesı aptada būiryqqa özgerıster engızıledı. Qarjylai şekteu alynyp, jaŋa būiryq şyǧady. Sonymen qatar, jaŋa baiqaularǧa osy özgerıster eskerıledı", - dedı ministr. Osylaişa, ǧylymi qyzmetkerlerdıŋ eŋbekaqysyna qatysty qaǧidalar qaita qaralyp, özgerıster engızıletını belgılı boldy.