Rinat Zaitov: "Bankter alaiaqtardyŋ äreketı üşın ötemaqy töleuı kerek"

Mäjılıs deputaty Rinat Zaitov Qazaqstanda künnen-künge örşıp bara jatqan onlain alaiaqtyq mäselesın köterıp, Qarjy naryǧyn retteu jäne damytu agenttıgınıŋ töraǧasyna deputattyq saual joldady. Ol kiberalaiaqtardyŋ äreketterı halyqqa ülken ziian tigızıp jatqanyn jäne būl qylmystarǧa bankterdıŋ de jauapkerşılıgı boluy kerek ekenın basa aitty. Zaitovtyŋ aituynşa, alaiaqtar tek azamattardyŋ şottarynan aqşa ūrlap qana qoimai, olardyŋ atyna syrttai nesie räsımdep, halyqty tyǧyryqqa tırep otyr. Deputat memlekettık organdardyŋ da būl mäselege nemqūraily qaraitynyn synady. "Ökınışke qarai, jazyqsyz jem bolǧan jandardyŋ jaǧdaiyn ūǧyp jatqan Ükımet te, bankter de körınbeidı. Köptegen alaiaqtyq faktılerınde bank nemese jergılıktı organ ökılderınıŋ qatysy bar ekenı däleldengen", – dedı Zaitov. Deputat keltırgen mälımetke säikes, Qaraǧandy qalasynyŋ Jūmyspen qamtu jäne äleumettık qorǧau basqarmasynyŋ qyzmetkerı mügedektıgı bar jäne zeinettegı 90 adamnyŋ şotyndaǧy aqşany jymqyrǧan. Sondai-aq, Taldyqorǧan, Astana, Almaty qalalarynda bank qyzmetkerlerı azamattardyŋ jeke mälımetterıne qol jetkızuge kömekteskenı anyqtalǧan. 2025 jyldyŋ qaŋtar-aqpan ailarynyŋ özınde QR QK 250-baby ("Ökılettıkterdı terıs paidalanu") boiynşa – 15 ıs jäne QR QK 254-baby ("Mındetterıne adal qaramau") boiynşa – 17 ıs qozǧalǧan. Rinat Zaitov bankterdıŋ kiberqylmystan qorǧauǧa mındettı ekenın, alaida eşqandai jauapkerşılık kötermeitının synǧa aldy. Onyŋ aituynşa, alaiaqtar ūrlaǧan aqşanyŋ ornyn toltyru banktıŋ mındetı boluy tiıs. "Säl qinalsa, memleketten milliardtap qarjyny qaitarymsyz alatyn, öz qatelıkterıne jauap beruden jaltaratyn qaiyrymsyz bankter qaşanǧa deiın tairandamaq? Naqaqtan-naqaq qaryzǧa batqan halyqty qorǧaityn uaqyt keldı!" – dep aşyndy deputat. Rinat Zaitov osy salaǧa ekı naqty talap qoidy. Bırınşı talap: Ekınşı deŋgeilı bankter alaiaqtardan zardap şekken azamattardyŋ şottaryn būǧattan şyǧaruy kerek. Sonymen qatar, mūndai sanattaǧy adamdardyŋ şottaryn būǧattauǧa zaŋmen tyiym salu qajet. Ekınşı talap: Kiberalaiaqtar ūrlaǧan aqşanyŋ şyǧynyn bank öteuge mındettı boluy tiıs, öitkenı bankter klientterdıŋ qarjysyn saqtauǧa tıkelei jauapty. Būl mäsele qoǧamda ülken rezonans tudyryp otyr. Endı Ükımet pen qarjy sektoryndaǧy jauapty organdar qandai şeşım qabyldaityny belgısız.