AQŞ prezidentı Donald Tramp Resei prezidentı Vladimir Putinmen Resei men Ukraina arasyndaǧy soǧysty toqtatu üşın kelıssözderdı jedel bastau turaly söileskenın mälımdedı, dep habarlaidy "Adyrna" ūlttyq portaly.
«Bız komandalarymyzdyŋ kelıssözderdı dereu bastaityny jönınde kelıstık jäne äuelı Ukraina prezidentı Vladimir Zelenskiige qoŋyrau şalyp, būl äŋgıme turaly habarlaudan bastaimyz. Men mūny däl qazır jasaimyn», – dep jazdy Tramp özınıŋ äleumettık jelıdegı paraqşasynda.
Tramptyŋ aituynşa, ol Putinmen tek Ukraina mäselesın ǧana emes, sondai-aq Taiau Şyǧysty, energetikany, jasandy intellekttı, dollardyŋ küşın jäne basqa da taqyryptardy talqylaǧan.
«Bız ekı eldıŋ ūly tarihy turaly oi jügırttık jäne Ekınşı düniejüzılık soǧysta bırlesıp sättı küreskenımızdı eske aldyq. Resei ondaǧan million adamynan aiyryldy. Bız de köptegen azamatymyzdy joǧalttyq. Bız halyqtarymyzdyŋ küştı jaqtary turaly äŋgımelestık jäne yntymaqtastyqtyŋ bızge qanşalyqty paida äkeletının talqyladyq. Bıraq eŋ aldymen, bız ekeuımız de kelıskendei, Resei men Ukraina arasyndaǧy soǧysta bolyp jatqan milliondaǧan ölımdı toqtatqymyz keledı», – dedı Tramp.
«Bız bır-bırımızdıŋ elderımızge saparmen baru mümkındıgın qosa alǧanda, öte tyǧyz yntymaqtasuǧa kelıstık. Men memlekettık hatşy Marko Rubiony, ortalyq barlau basqarmasynyŋ direktory Djon Retkliffty, ūlttyq qauıpsızdık jönındegı keŋesşı Maikl Uoltsty jäne elşı ärı arnaiy ökıl Stiv Uitkoffty kelıssözderge jetekşılık etuge şaqyrdym. Men būl kelıssözderdıŋ sättı bolatynyna nyq senımdımın. Eger men prezident bolǧanymda, būl soǧys bastalmas edı, bıraq ol bastalyp kettı, sondyqtan ony toqtatu qajet» - dep qosty Tramp .
Tramp telefon arqyly söileskenı üşın Putinge alǧysyn bıldırdı.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz