Qazaqstan Respýblıkasy Syrtqy ister mınıstriniń birinshi orynbasary Aqan Rahmetýllın Astana men Kıev Kaspıı qubyr konsorıýmynyń (QQK) munaı aıdaý stanııasyna drondarmen jasalǵan shabýyldyń saldaryn dıplomatııalyq jolmen sheshetinin málimdedi, dep habarlaıdy "Adyrna" ulttyq portaly.
"Biz bul jaǵdaı týraly habardarmyz. Qazaqstannyń Energetıka mınıstrligi málimdeme jasap, shabýyl jasalǵanyna qaramastan, munaı burynǵy kólemde aıdalyp jatqanyn aıtty. Árıne, biz ýkraın tarapymen sóılesemiz, kelissózder júrgizemiz, kezdesýler ótedi. Mundaı jaǵdaıdyń qaıtalanbaýy úshin bul máseleni mindetti túrde dıplomatııalyq jolmen sheshýimiz kerek", – dedi Rahmetýllın.
Eske sala keteıik, 17 aqpanǵa qaraǵan túni Krasnodar ólkesiniń Kavkaz aýdanyndaǵy "Kropotkınskaıa" munaı aıdaý stanııasyna jeti dronmen shabýyl jasaldy. Stanııa jedel túrde jumysyn toqtatyp, Teńiz – Novorossıısk baǵyty boıynsha munaı tasymaldaý apattyq shemaǵa aýystyryldy. Nysan qatty zaqymdanǵany aıtyldy.
Reseılik "Transneft" kompanııasy shabýyldyń saldaryn joıýǵa 1,5-2 aı qajet bolatynyn, bul Qazaqstannan tasymaldanatyn munaı kóleminiń shamamen 30%-ǵa tómendeýine alyp kelýi múmkin ekenin habarlady.
Ýkraına armııasynyń Bas shtaby 17 aqpanǵa qaraǵan túni Krasnodar ólkesindegi Ilsk munaı óńdeý zaýytyna soqqy jasalǵanyn rastady. Olar nysanda aýqymdy órt bolǵanyn málimdedi.
