Qazaqstannyŋ tükpır-tükpırınen kelgen 120-dan astam belsendı äiel «AMANAT» partiiasynyŋ Äielder qanaty ūiymdastyrǧan «Äielder – jasampaz köşbasşylar» atty saiasi köşbasşylyq boiynşa oqu kurstaryna qatysty. Bügın olar Mäjılıs Spikerı, partiia Töraǧasy Erlan Qoşanovpen kezdestı.
Kezdesudı aşa otyryp, Erlan Qoşanov jinalǧandardy aldaǧy 8 nauryz – Halyqaralyq äielder künımen qūttyqtady. Ol Prezident Qasym-Jomart Kemelūly Toqaevtyŋ auqymdy saiasi reformalarynyŋ arqasynda elde genderlık teŋdıktı qamtamasyz etu jäne otbasylyq qūndylyqtardy nyǧaitu mäselelerı sapaly jaŋa deŋgeide şeşılıp jatqanyn atap öttı.
«Memleket basşysy II respublikalyq mäslihat deputattarynyŋ forumynda atap ötkendei, ökıldı bilık organdaryndaǧy äielderdıŋ sany östı, sondai-aq äielderdıŋ ärtürlı salalardaǧy bastamalary jan-jaqty memlekettık qoldauǧa ie boluda. Partiia müşelerınıŋ şamamen 60%-yn äielder qūraidy. Bügıngı taŋda, jaŋa saiasi jaǧdailarǧa qaramastan, «AMANAT» partiiasy öz pozisiiasyn nyǧaituyn jalǧastyruda. Bızdıŋ Äielder qanaty partiia men äielder qauymdastyǧy arasyndaǧy şynaiy köpırge ainaldy. Būl ärbır belsendı äieldıŋ dauysy estılıp, onyŋ ideialary jüzege asatynyna kepıldık beredı. Sonymen qatar Äielder qanaty qoǧamdyq-saiasi pıkırtalastarǧa ärtürlı közqaras pen tereŋdık qosyp otyr», – dedı ol.
Erlan Qoşanov sondai-aq «AMANAT» partiiasynyŋ Äielder qanaty müşelerı zaŋ şyǧaru jūmysyna belsene qatysyp jürgenın atap öttı. Mäselen, olardyŋ ūsynystary äielderdıŋ qūqyqtaryn qorǧau jäne balalardyŋ qauıpsızdıgın qamtamasyz etu mäselelerı boiynşa zaŋ jobasyn äzırleu kezınde eskerıldı. Būl zaŋ tolyq küşıne endı, bügınde osy saladaǧy qylmystyq qūqyq būzuşylyqtar edäuır azaidy, tūrmystyq zorlyq-zombylyq turaly şaǧymdar sany üşten bırge qysqardy, el boiynşa 69 daǧdarys ortalyǧy men baspana aşyldy. Būdan bölek, bügınde deputattar talqylap jatqan psihologiialyq qyzmet turaly zaŋ jobasyna da köşbasşy äielder tarapynan oryndy tüzetuler engızıldı.
Sondai-aq partiia Töraǧasy äielderdıŋ qūqyqtaryn būzǧany üşın zaŋnamany qataŋdatudyŋ maŋyzdylyǧyna nazar audardy. Soŋǧy uaqytta «qalyŋdyq ūrlau» dästürın jeleu etıp, keibır jastar jas qyzdardyŋ qūqyqtaryn būzyp, olardy erkınen tys nekege tūrǧyzuda. Būl mäselege Memleket basşysy Atyrauda ötken Ūlttyq qūryltai otyrysynda erekşe nazar audardy. Sondyqtan deputattar «nekege mäjbürleu» üşın qylmystyq jauapkerşılıktı engızu normalaryn ūsyndy. Būl rette, Mäjılıs deputattary Äielder qanatynan da ūsynystar kütedı.
Mäjılıs Spikerı Äielder qanaty aldynda tūrǧan bırqatar jaŋa mındetterdı de belgıledı. Atap aitqanda, «Tomiris» jobasynyŋ auqymyn keŋeitıp, bolaşaq köşbasşylardy studenttık kezden bastap daiyndauǧa nazar audaru qajet. Ol üşın joǧary oqu oryndarymen yntymaqtastyq ornatu kerek, äsırese saiasattanu jäne äleumettık mamandyqtardyŋ äleuetıne köŋıl bölu maŋyzdy. Sonymen qatar jobaǧa qatysuşylardy taldamalyq jūmysqa belsendı tartu jäne äielder käsıpkerlıgın qoldaudy küşeitu kerek.
Erlan Qoşanov äielderdıŋ jūmysqa ornalasuy men özın-özı damytu mümkındıkterın keŋeitudıŋ, sondai-aq olardyŋ ekonomikaǧa, saiasatqa jäne basqa da salalarǧa belsendı qatysu mädenietın qalyptastyrudyŋ maŋyzdylyǧyn atap öttı.
Is-şarada sondai-aq Konstitusiialyq Sot Töraǧasy Elvira Azimova, Mädeniet jäne aqparat ministrı, Prezident janyndaǧy Äielder ısterı jäne otbasylyq-demografiialyq saiasat jönındegı Ūlttyq komissiia töraiymy Aida Balaeva, Qazaqstandaǧy Konrad Adenauer qory ökıldıgınıŋ direktory Viktor Frank söz söiledı.
Būdan keiın öŋırlerden kelgen qatysuşylar öz jobalary turaly baiandap, äielder köşbasşylyǧyn damytu jönınde ūsynystaryn jetkızdı. «AMANAT» partiiasynyŋ Aqtöbe oblystyq mäslihatyndaǧy fraksiiasynyŋ jetekşısı Külparşyn Aidarhanova auyl jastaryna öz äleuetın aşuǧa jäne jeke käsıbın bastauǧa kömektesetın «DEM» jobasy turaly aityp berdı. Jambyl oblysynyŋ Äielder küşterı aliansynyŋ töraiymy Ämina Qainazarova käsıpkerlıktı jaŋa bastaǧan äielder üşın 3-5 jylǧa salyq jeŋıldıkterın engızudı ūsyndy. Atyrau oblysy Qamysqala auyldyq okrugınıŋ äkımı Rafiǧat Täjidenova käsıpkerlık qyzmet üşın jer telımderın bölu tärtıbın jeŋıldetudı jäne bos üilerdı kommersiialyq nysandarǧa ainaldyrudy ūsyndy. «IteachMe» qorynyŋ direktory Zahira Begalieva sifrlandyru mümkındıkterı turaly aityp, onyŋ erekşe qajettılıkterı bar adamdarǧa üiden jūmys ısteuge jol aşatynyn atap öttı. Petropavldyq «Sensitive» ansamblınıŋ körkemdık jetekşısı Olga Rostovşikova estu qabıletı tömen jäne mülde estımeitın balalardy äleumettendıru jobalary jaiynda bölıstı. Al Şyǧys Qazaqstan oblysynan kelgen, 30 jyldyq memlekettık qyzmet täjıribesı bar Galina Pahomova adamdarmen jūmys ısteudegı käsıbi täjıribesı jäne kürdelı jobalardy jüzege asyrudaǧy jetıstıkterımen bölıstı.
