AQŞ- prezidentı Donald Tramp İrannyŋ Joǧarǧy basşysy aiatolla Äli Hameneige iadrolyq kelıssözderge qatysty hat joldaǧanyn mälımdedı, dep habarlaidy "Adyrna" ūlttyq portaly ABC News-ke sılteme jasap.
"İran mäselesın şeşudıŋ ekı joly bar: äskeri şara nemese kelısımge kelu. Men kelısım jasaudy jön köremın", – dedı Tramp.
Ol eger kelısımge qol jetkızılmese, äskeri äreketterge baruy mümkın ekenın eskerttı.
"Uaqyt taiap qaldy. Bırdeŋe bolatyny anyq. Men olarǧa hat jazyp, kelıssöz jürgızuge şaqyrdym. Eger bız soǧysqa aralasuǧa mäjbür bolsaq, būl İran üşın ülken apatqa ainalady", – dedı ol.
Alaida İrannyŋ BŪŪ-daǧy tūraqty ökıldıgı Tramptan eşqandai hat almaǧanyn mälımdedı.
Tramp İran basşylyǧyna ultimatum qoimaǧanyn aitty.
"Bız bırdeŋe ısteuımız kerek, öitkenı İrannyŋ iadrolyq qaruǧa ie boluyna jol beruge bolmaidy", – dep eskerttı.
2019 jyly AQŞ prezidentı Japoniianyŋ būrynǧy premer-ministrı Sindzo Abenıŋ kömegımen ūqsas ūsynys joldaǧan. Alaida, aiatolla Hamenei odan bas tartqan.
"Men Tramppen eşqandai hat almastyrudy jön körmeimın", – degen edı İran basşysy sol kezde.
Eske sala ketsek, Tramp AQŞ prezidentı bolǧan kezınde İran men Obama äkımşılıgı arasynda jasalǧan iadrolyq kelısımnen bırjaqty şyqqan bolatyn.
2015 jyly qabyldanǧan būl kelısım İranǧa urandy 3,67%-ǧa deiın baiytuǧa jäne 300 kg-nan aspaityn qor jinauǧa mümkındık bergen.
Ötken aida Tramp İranǧa "maksimaldy qysym körsetu" turaly memorandumǧa qol qoidy. Būl qūjat İran mūnaiynyŋ eksportyn şekteudı közdeidı, osylaişa Tegerandy iadrolyq qaru jasaudan bas tartuǧa mäjbürleu maqsaty qoiylǧan.
Ūqsas jaŋalyqtar
