«Qazaqmys» korporasiiasy himiialyq zerthanalar basqarmasynyŋ būrynǧy basşysy Baqyt Ädılova «kompaniia sirek kezdesetın metaldardy elden eksporttaidy» degen mälımdeme jasady. Būl turaly ol «Giperborei» baǧdarlamasynda aitty, dep habarlaidy «Adyrna» tılşısı.
Eks-qyzmetker korporasiianyŋ himiialyq saraptama jürgızbesten, qūramynda baǧaly jäne sirek jer metaldary bar ken men mys konsentratyn syrtqa şyǧaryp jatqanyn atap öttı. Aituynşa, būl täsıl şikızattyŋ naqty baǧasyn jasyru arqyly onyŋ qūnyn jasandy türde tömendetuge jäne ūlttyq ekonomikaǧa ziian keltıruge baǧyttalǧan.
Baqyt Ädılova älemde metaldardy esepke alu üşın joǧary däldıktegı himiialyq taldau ädısterı qoldanylatynyn, al «Qazaqmys» tek rentgenspektraldyq ekspress-taldau ädısın paidalanǧanyn alǧa tartty.
«Qarapaiym jūmysşydan bastap, käsıporyn basşysyna deiın rentgenspektraldyq ädıstıŋ naqty emes, jartylai sandyq taldau ädısı ekenın bıledı. Joǧary qatelıkke bailanysty būl ädıs tek tehnologiialyq prosestı tüzetu üşın ǧana qoldanylady. Al metall esepke alu jäne özara esep aiyrysu üşın joǧary däldıktegı himiialyq taldau ädısterı qoldanylady»,—dep tüsındırdı ol.
Ädılova korporasiianyŋ Jezqazǧandaǧy rentgenospektraldy zerthanany zaŋsyz akkreditasiiadan ötkızgenın mälımdedı.
«Būl – akkreditasiia turaly zaŋdy tıkelei būzu ǧana emes, sondai-aq ken men ony qaita öŋdeu önımderındegı metaldar qūramyn būrmalaudy zaŋdastyru bolyp esepteledı. Sondai-aq eksporttalatyn şikızatqa rentgenospektraldyq ädıspen jürgızılgen sertifikattau taldaularyna qatysty däleldı qūjattar qūqyq qorǧau organdaryna tapsyryldy»,—dedı ol.
Alaida «Qazaqmys» korporasiiasy būl aiyptaulardy joqqa şyǧardy.
«Sirek kezdesetın metaldardyŋ qūramyn jasyru, sondai-aq eksporttalatyn şikızat qūnyn jasandy türde tömendetu turaly mälımdemeler şyndyqqa janaspaidy»,— dep mälımdedı kompaniia.
Aitularynşa, korporasiia sirek kezdesetın metaldardy maqsatty türde öndırumen ainalyspaidy, al onyŋ qyzmetı ūlttyq jäne halyqaralyq standarttarǧa tolyq säikes keledı.
