Köktem kelgen saiyn elımızde su tasqyny qaupı küşeie tüsetını belgılı. Osyǧan bailanysty Kökşetau qalasy äkımdıgı ötken jylǧy jaǧdailardy eskere otyryp, aldyn alu jūmystaryn küşeittı. Keşendı şaralardy qolǧa aldy. Būl turaly brifing barysynda qala äkımınıŋ orynbasary Aqjol Qylyşbaev mälım ettı, dep habarlaidy Öŋırlık kommunikasiialar qyzmetınen.
Kökşetau qalasynyŋ aumaǧynda Qylşaqty men Qopa kölı ornalasqan, al Krasnyi Iаr auyldyq okrugınen Şaǧalaly özenı aǧyp ötedı. Būl – su tasqyny qaupı joǧary aimaqtar. Osy rette qala äkımdıgı injenerlık jūmystardy jüielı türde jürgızude.
«Qys boiy qala köşelerınen 200 myŋnan astam tekşe metr qar şyǧaryldy. Su basu qaupın azaitu maqsatynda aryq jüielerı, su ötkızu kanaldary, özen arnalary tazartyldy. Sonymen qatar, biyl alǧaş ret qysqy senbılık ūiymdastyrylyp, 16 000 tekşe metrden astam qar syrtqa tasymaldandy. Qala aumaǧynda 6 km astam su būru aryqtary tereŋdetılıp, 6,4 km aryq-kanal jüiesı qalpyna keltırıldı. 53 su ötkızu qūbyry auystyrylyp, nöserlı kärız jüielerı ystyq sumen tazartyldy» , dedı spiker.Su tasqynyn boldyrmau üşın Qopa kölı men Qylşaqty özenı qūiylatyn jerde mūz jaru jūmystary bastalyp kettı. Būl özendegı su deŋgeiın rettep, köktemgı su tasqynynyŋ aldyn alu üşın maŋyzdy qadam.
«Kökşetauda su tasqynyna qarsy küreske 62 tehnika bırlıgı, 25 jūmysşy, 17 arnaiy tehnika men 18 motopompa jūmyldyrylǧan. Qosymşa 9 motopompa satyp alynyp, taǧy 8-ın alu josparlanuda. Sondai-aq, qala qoimalarynda 10 000 qap, 20 000 tonna inerttı material, janarmai qory saqtalǧan. Qauıptı aimaqtarǧa 4 150 qap töseldı, 14 mekenjai boiynşa su basudyŋ aldyn alu jūmystary jürgızıldı»Qala äkımınıŋ orynbasarynyŋ aituynşa, tötenşe jaǧdai oryn alǧan jaǧdaida «Transportnik» saiajai tūrǧyndary qauıpsız aimaqqa köşırıledı. Sonymen qatar, mal evakuasiiasy men jem-şöp qoryn saqtau jospary äzırlengen.
«Kökşetaudaǧy su tasqyny kezeŋı tolyq baqylauda. Barlyq qauıp-qater eskerılıp, tiıstı şaralar qabyldanyp jatyr. Tūrǧyndardan kez kelgen tötenşe jaǧdai kezınde jedel ştabqa habarlasu sūralady», dep qorytyndylady ol.
