Kökşetauda Ūlttyq kiım festivalı öttı

Nauryz merekesın toilau aiasynda Kökşetauda ūlttyq kiımder künıne arnalǧan oblystyq «Sän men saltanat» festivalı öttı. Būl şara qazaq halqynyŋ mädeni mūrasyn saqtau, därıpteu jäne ūlttyq kiımnıŋ äsemdıgın körsetu maqsatynda ūiymdastyryldy, dep habarlaidy Öŋırlık kommunikasiialar qyzmetınen. Festivalge Aqmola oblysynyŋ är audanynan dizainerler qatysyp, öz jūmystaryn ūsyndy. Şara aiasynda ūlttyq kiım ülgılerı tanystyrylyp, olardyŋ tarihy men simvolikalyq maŋyzy jaily aityldy. Festivalge qatysqan şeberlerdıŋ aituynşa, ūlttyq kiım – jai ǧana sän emes, ol halqymyzdyŋ tarihy, mädenietı men ruhani bolmysynyŋ ainasy. Ūlttyq kiımderdı tıgu ülken şyǧarmaşylyq pen tabandylyqty talap etedı. «Bız köp jyldan berı ūlttyq kiımderdı tıgıp, halyqqa ūsynyp kelemız. Būl sala tereŋ bılım men ülken şeberlıktı qajet etedı. Är köilek qazaq qyzynyŋ näzıktıgın, erekşelıgın körsetetındei etıp jasalady», – deidı Kökşetau qalasyndaǧy «Svetlana» atelesınıŋ direktory Svetlana Ehlakova. Dizainer Äsemgül Ospanovanyŋ aituynşa, bügınde ūlttyq kiımder tek merekelerde ǧana emes, kündelıktı ömırde de sänge ainalyp keledı. «Bızdıŋ toptamaǧa dästürlı ülgılermen qatar, zamanaui sänge sai kiımder de engızılgen. Ūlttyq kiımdı därıpteu tek sän ürdısı ǧana emes, būl – ūlttyŋ ruhani bırlıgın nyǧaituǧa, tüp-tamyrymyzǧa degen maqtanyş sezımın arttyruǧa baǧyttalǧan qūndylyq. Qazaqstan Prezidentı Qasym-Jomart Toqaev Ūlttyq qūryltaida ūlttyq kiım kiiudıŋ sänge ainaluy kerektıgın atap ötken bolatyn», – deidı ol. Festival soŋynda barlyq dizainerlerge alǧys hattar men arnaiy syilyqtar tabystaldy. Būl şara ūlttyq mūrany saqtau men ony bolaşaq ūrpaqqa jetkızudıŋ maŋyzdylyǧyn taǧy bır märte aiqyndai tüstı desedı ūiymdastyruşylar.