Qazaqstan Respublikasy Premer-Ministrınıŋ keŋesşısı Eraly Toǧjanov jūmys saparymen Aqmola oblysyna baryp, öŋır äkımınıŋ orynbasary Mūrat Balpanmen bırge su tasqyny jaǧdaiymen tanysty. Sapar barysynda ol gidrotehnikalyq qūrylystardy qarap şyǧyp, Selinograd, Arşaly, Astrahan jäne Atbasar audandarynda jürgızılgen su tasqynyna qarsy ıs-şaralardy baǧalady.
Astana su qoimasynyŋ jaǧdaiyna erekşe nazar audaryldy. Qazırgı uaqytta qoimadan su aǧu kölemı az jäne eldı mekenderge qauıp töndırmeidı. Qosymşa qorǧanys şarasy retınde Arşaly audanynyŋ Jıbek joly auylynda «Demeu Qazaqstan qory» qorynyŋ qarajaty esebınen ūzyndyǧy 6,3 km qorǧanys bögetı salyndy, būl eldı mekennıŋ su basu qaupın aitarlyqtai tömendetedı.
Selinograd audanynda Talapker jäne Qoiandy auyldarynda jürgızılgen su tasqynyna qarsy şaralar tekserıldı. Būl eldı mekenderde erıgen qar suyn būru üşın arnaiy ainalyp ötetın kanaldar salynǧan.
Staryi Koluton auylynda Eraly Toǧjanov ūzyndyǧy 3,6 km Koluton özenınıŋ arnasyn tazalau jäne tereŋdetu jūmystarynyŋ barysymen tanysty. Būl jūmystar «Demeu Qazaqstan qory» demeuşılerdıŋ qarajaty esebınen jürgızılude.
Atbasar audanynda, jyl saiynǧy su basu qaupın eskere otyryp, Jabai özenınıŋ arnasyn tereŋdetu jäne keŋeitu jūmystary jürgızıldı. Sonymen qatar üş su ötkızgış şliuz salynyp, jaŋa qūrylystardy erıgen qar suynan qorǧau üşın ainalma kanal jasaldy.
Sapar qorytyndysy boiynşa jedel su tasqynyna qarsy ştabtyŋ otyrysy öttı. Oǧan TJD, «Qazgidromet» AQ filialy jäne basqa da tiıstı mekemelerdıŋ ökılderı qatysty.
Oblys äkımınıŋ orynbasary Mūrat Balpan su tasqyny kezeŋı öŋırde tūraqty rejimde ötıp jatqanyn atap öttı.
«Esıl, Jabai jäne Nūra özenderınıŋ negızgı basseinderınde mūzdyŋ eruı baiqalady. Su tasqyny qaupın azaitu üşın su aidyndarynan sudy soru jäne būru jūmystary jalǧasuda. Sonymen qatar mūz keptelısterın joiu üşın jarylys jūmystary jürgızılude. Qazırdıŋ özınde 25 myŋ şarşy metrden astam mūz joiyldy», — dedı ol.Su tasqynyna qarsy ıs-şaralarǧa Astana, Qaraǧandy, Şyǧys Qazaqstan, Qyzylorda, Jambyl jäne Almaty oblystarynan TJM küşterı, sondai-aq Aqmola öŋırınıŋ aumaqtyq qorǧanys bölımşelerı jūmyldyryldy. Jiyn qorytyndysy boiynşa Eraly Toǧjanov jürgızılıp jatqan su tasqynyna qarsy şaralarǧa oŋ baǧa berıp, aldyn alu ıs-şaralaryn jalǧastyrudy tapsyrdy.
