Qazaqstan qarjygerler qauymdastyǧynyŋ mälımetınşe, elımızdıŋ Reseiden importqa täueldılıgı küşeie tüsken, dep habarlaidy "Adyrna" ūlttyq portaly.
«Qazaqstan men Resei arasyndaǧy tauar ainalymy 2024 jyly ötken jyldyŋ säikes kezeŋımen salystyrǧanda 3%-ǧa ösıp, 27,8 mlrd dollarǧa jettı. Būl negızınen importtyŋ 8%-ǧa artuy esebınen boldy, al Qazaqstannan Reseige eksport 6%-ǧa tömendedı. İmporttyŋ ösuı men eksporttyŋ qysqaruy arasyndaǧy qūrylymdyq teŋgerımsızdık qazaqstandyq tauarlardyŋ bäsekege qabılettılıgınıŋ tömendeuıne jäne Resei importyna täueldılıktıŋ artuyna alyp keluı mümkın», – delıngen särsenbı künı jariialanǧan habarlamada.
2024 jyly Reseidıŋ Qazaqstannyŋ jalpy tauar ainalymyndaǧy ülesı 20%-ǧa deiın ūlǧaidy (2023 jyly – 19%). İmporttaǧy ülesı 28%-dan 31%-ǧa deiın artsa, eksporttaǧy ülesı 13%-dan 12%-ǧa tömendegen.
Qazaqstannan Reseige eksporttalatyn himiia önımderınıŋ (+189 mln dollar) jäne metaldardyŋ (+47 mln dollar) ülesı artqanymen, maşina jasau (-629 mln dollar) jäne mineraldyq önımder (-370 mln dollar) kölemı qysqarǧan. Būl Resei tarapynan qazaqstandyq şikızattyq tauarlarǧa sūranystyŋ öskenın körsetedı.
2024 jyly Qazaqstanǧa Reseiden toqyma būiymdary (+364 mln dollar), baǧaly metaldar (+390 mln dollar) jäne himiia önımderı (+334 mln dollar) köptep äkelıngen. Sonymen qatar, azyq-tülık (+129 mln dollar), azyq-tülıkke jatpaityn tauarlar (+505 mln dollar) jäne öndırıstık tauarlar (+929 mln dollar) importy da artqan.
Reseimen saudadaǧy terıs balans 2023 jyly 6,6 mlrd dollar bolsa, 2024 jyly 8,7 mlrd dollarǧa deiın ūlǧaiǧan. Būl Qazaqstannyŋ tölem balansyna qosymşa qysym tüsırgen.
Sauda kölemınıŋ artuyna bailanysty rubldıŋ tölem jüiesındegı ülesı östı. 2024 jyldyŋ alǧaşqy toǧyz aiynda eksport boiynşa tölemderdıŋ 77%-y, al import boiynşa 96%-y rublmen jürgızılgen.
QQQ sarapşylarynyŋ aituynşa, Reseiden importtyŋ köbeiuı Qazaqstannyŋ ışkı öndırısınıŋ jetkılıksızdıgın körsetedı. Keibır importtyq tauarlardy (avtokölık bölşekterı, mūnai önımderı, kiım, därı-därmek, azyq-tülık önımderı) jergılıktı öndırıs arqyly almastyru üşın memlekettık baǧdarlamalar qajet.
Sarapşylardyŋ pıkırınşe, Reseiden importtyŋ artuy teŋge men rubldıŋ özara bailanysyn küşeitıp, infliasiia men valiuta naryǧyna qysym jasaidy. Eger sauda teŋgerımın retteu şaralary qabyldanbasa, būl ürdıs jalǧasuy mümkın.
