Norvegiianyŋ köşı-qon erejesın būzǧan Qazaqstannyŋ 45 azamaty deportasiialandy. Būl turaly 30 qyrküiekte Nūr-Sūltanda ötken brifingte syrtqy ıster ministrlıgı baspasöz qyzmetınıŋ jetekşısı Aibek Smadiiarov aitty.
Ministrlık ökılınıŋ aituynşa, "Qazaqstannyŋ 59 azamaty Norvegiiaǧa jūmys ızdep barǧan, bıraq olarda tek turistık viza bolǧan. Qazırge deiın 45-ı Qazaqstanǧa qaitarylǧan, qalǧan 14-ı bügın deportasiialanuy mümkın".
- Norvegiiaǧa Şengen vizasymen baryp mausymdyq jūmys ısteuge rūqsat etılmeidı. Qazaqstan azamattaryna Norvegiiada [jūmys ısteuge] rūqsat etetın qūjattardy Norvegiianyŋ Reseidegı elşılıgı ǧana beredı, - deidı Aibek Smadiiarov.
Būǧan deiın Norvegiianyŋ VG saity "köşı-qon erejelerın būzǧan" bır top şetel azamatynyŋ ūstalǧanyn, olardyŋ basym bölıgı Qazaqstan azamaty ekenın jazǧan. Ūstalǧandardyŋ 60-tan astamy - Qazaqstan, altauy - Qyrǧyzstan, ekeuı Resei azamaty dep aitylǧan.
27 qyrküiekte Qazaqstannyŋ Norvegiiadaǧy elşısınıŋ keŋesşı uäkılı Talǧat Jūmaǧūlov ta "Norvegiiaǧa Qazaqstannyŋ 60 azamaty zaŋsyz barǧanyn" mälımdegen.
Soŋǧy jyldary jūmys ısteu maqsatynda şetelge ketken qazaqstandyqtar köbeigen. Qazaqstan syrtqy ıster ministrlıgı ötken jyly Oŋtüstık Koreiada şamamen myŋdaǧan qazaqstandyq zaŋsyz jūmys ıstep jürgenın habarlaǧan.
Reseilık köşı-qon qyzmetınıŋ jaqynda jariialaǧan baiandamasyna qaraǧanda, 2019 jyly qaŋtar men mausym aralyǧynda Reseige 100 myŋnan astam Qazaqstan azamaty jūmys ızdep kelgen.
"Azattyq" radiosy
