Bügın, körnektı jazuşy, publisist, audarmaşy, synşy jäne jurnalist Ǧabbas Qabyşūly 90 jasqa toldy.
Ol 1935 jyly Şyǧys Qazaqstan oblysy, Ūlan audany, Ūranqai auylynda düniege kelgen.
Ǧabbas Qabyşūly eŋbek jolyn 1955 jyly oblystyq «Altai bolşevigı» (qazırgı «Didar») gazetınde korrektor, bölım meŋgeruşısı, jauapty hatşy qyzmetterın atqarudan bastady. 1966 jyly respublikalyq «Qazaq ädebietı» gazetıne auysyp, jauapty hatşynyŋ orynbasary, körkem ädebiet jäne ädebi syn bölımderınıŋ meŋgeruşısı bolyp qyzmet ettı.
1974 jyldan KSRO Ädebi qory Qazaq filialynyŋ direktory, 1983 jyly respublikalyq «Ara-Şmel» satira jurnalynyŋ bas redaktory, 1994–1996 jyldary Qazaqstan Jazuşylar odaǧy basqarmasynyŋ ekınşı hatşysy qyzmetterın atqarǧan.
Äzıl-syqaq äŋgımeler, novellalar, syn, körkem ocherk, kösemsöz, türlı taqyrypqa maqala jazǧan jazuşynyŋ satiralyq körınısterı «Qymyzhana», «Tamaşa» teatrlarynda sahnalanǧan.
Ǧabbas Qabyşūlynyŋ ötkır tılı men qoǧamdyq-äleumettık mäselelerge qatysty synşyl közqarasyn 2011 jyly jazylǧan, prezident sailauyna daiyndyq kezeŋın beineleitın "Kandidattyŋ aty - kandidat" satiralyq äŋgımesınen de aŋǧaruǧa bolady.
"Bıtpeitın kezektı merzımderınıŋ kelesısınıŋ bıtuıne älı bır jyly bolsa da, baiaǧydan bergı prezidentımızdıŋ qaida, nege asyqqanyn iii... kım bılsın, äiteuır, merzımınen bır jyl būryn qaita sailanuy qajettıgın etıkke qaiyŋ şege qaqqandai etıp aitty", – dep, bilık basyndaǧy tūlǧalardyŋ asyǧystyǧy men zaŋdy öz yŋǧaiyna ikemdeitın ädetın äjualaidy.
Sondai-aq, jazuşy halyqtyŋ mınez-qūlqyn, sailau prosesındegı formalizm men populizmdı aşyq synaidy.
