Qyrǧyzstandaǧy “Rossotrudnichestvo” ökılı Oştaǧy Orys üiınıŋ qyzmetkerı Natalia Sekerinanyŋ tūtqyndaluyna alaŋdauşylyq bıldırdı. Ol Ukraina aumaǧyndaǧy äskeri qimyldarǧa jaldamalylardy tartty degen küdıkke ılıngen. Būl turaly «İnterfaks» agenttıgı jariialady, dep habarlaidy “Adyrna” ūlttyq portaly.
«Sekerina – Qyrǧyzstan azamaty, bızdıŋ Oştaǧy bölımşenıŋ jergılıktı qyzmetkerı. Ol 2024 jyldyŋ şılde aiynan bastap Orys üiınde jūmys ısteidı, media salasymen özara ıs-qimylǧa jauapty. Bız ony adal, aşyq ärı jauapty qyzmetker retınde tanimyz», – dedı Rossotrudnichestvo ökılderı.
Ūiym ökılderı ıstıŋ naqty män-jaiy turaly tolyq aqparatqa ie emesın aityp, tergeu barysynda barlyǧy anyqtalady dep ümıt bıldırdı. Sonymen qatar, Reseidıŋ ǧylym jäne mädeniet ortalyǧynyŋ tek ükımetaralyq kelısım aiasynda jūmys ısteitını erekşe atap ötıldı.
Sekerina men taǧy bırneşe adam Qyrǧyzstan azamattaryn basqa elderdegı qaruly qaqtyǧystarǧa qatysuǧa tartty degen küdıkpen ūstalǧany 17 säuırde habarlanǧan. 23 säuır künı Bışkektegı Pervomai audandyq sotynyŋ baspasöz hatşysy Nurzina Murzaeva būl aqparatty rastady. Onyŋ aituynşa, Sekerina būryn jurnalist bolyp jūmys ıstegen. Al ekınşı küdıktı Sergei Lapuşkin – Oş qalasy äkımdıgınıŋ baspasöz qyzmetınde bolǧan. Olarmen bırge taǧy ekı adamnyŋ ūstalǧany belgılı boldy, alaida olardyŋ jeke tūlǧalary anyqtalyp jatyr.
Ūstalǧandarǧa qatysty «Jaldamalylyq» baby boiynşa qylmystyq ıs qozǧaldy. Barlyǧyna qatysty būltartpau şarasy retınde 2025 jyldyŋ 17 mausymyna deiın qamauǧa alu şeşımı şyǧarylǧan. Küdıktılerdıŋ bırımen jūmys ısteitın advokattyŋ aituynşa, olar Ukraina aumaǧyndaǧy äskeri qimyldarǧa adamdar tartty degen küdıkke ılıngen. Būl aqparat rastalsa, olarǧa 15 jylǧa deiın bas bostandyǧynan aiyrylu qaupı tönıp tūr.
