Qytai halqy qazaq halqyna eşqaşan ziian keltırgen joq, bolaşaqta da ziian keltırmeidı. Būl mälımdemenı Qazaqstan Prezidentı Qasym-Jomart Toqaev Qazaqstan halqy Assambleiasynyŋ XXXIV sessiiasynyŋ plenarlyq otyrysynda aitty, dep habarlaidy “Adyrna” ūlttyq portaly.
Prezident atap ötkendei, qazaq qaşanda körşısın qadırlei bılgen. Quanyşta da, qiyndyqta da körşısıne süiengen, körşınıŋ qasynan tabylǧan.
«Körşı aqysy – täŋır haqysy» degen ūǧym dınımızde jäne dästürımızde bar. Būl – bızge atadan qalǧan ösiet, anadan berılgen qasiet.
Halqymyzdyŋ tatu körşılık dästürı älı de jalǧasyp keledı. Qonystas adamdar ūltyna, dınıne, tılıne qaramastan aralasyp, qūralasyp jatady. Qazaqstan körşı memlekettermen dostyqty nyǧaita tüsuge airyqşa män beredı. Resei – Qazaqstannyŋ būrynnan kele jatqan negızgı strategiialyq serıktesı ärı senımdı odaqtasy. Qytai elımen yqpaldastyq tamyry da tereŋde jatyr. Qytai halqy qazaq halqyna eşqaşan ziian keltırgen joq, bolaşaqta da ziian keltırmeidı. Alataudy teŋ jailaǧan qyrǧyzdar – bır tuǧan bauyrlarymyz. Ejelden enşıles özbek aǧaiyndy öz aǧam dep qadır tūtamyz. Tübımız bır dep türıkmenderdı tuys sanap, şyn jürekten qūrmetteimız. Qart Kaspiidıŋ jaǧasyndaǧy äzerbaijan elıne degen yqylasymyz da erekşe. Bır sözben aitsaq, körşı eldermen qarym-qatynasymyz bauyrlastyq ruhynda damyp keledı. Bızdıŋ aramyzda tüitkıldı mäsele joq”, - dep atap öttı Prezident.
Memleket basşysynyŋ aituynşa, Qazaqstan men Resei qūrlyqtaǧy eŋ ūzyn şekarany äuel bastan dau-damaisyz şegendep aldy. Jaqynda Qyrǧyzstan, Özbekstan jäne Täjıkstan ūzaq jyl boiy şeşımın tappaǧan şekara mäselesı boiynşa ortaq mämılege kelıp, tarihi kelısımge qol qoidy dep aituǧa bolady.
“Bız bauyrlas elder üşın quanamyz, olardy ärdaiym qoldaimyz”, - dedı Prezident otyrysta.
