Memleket basşysy Qasym-Jomart Toqaev «Baiqoŋyr» ǧaryş ailaǧynyŋ qūrylǧanyna 70 jyl toluyna orai video ündeu joldady, dep habarlaidy «Adyrna» tılşısı.
«Qūrmettı dostar! Qadırlı ǧaryş salasynyŋ qyzmetkerlerı men ardagerlerı! Barşaŋyzdy «Baiqoŋyr» ǧaryş ailaǧynyŋ qūrylǧanyna 70 jyl toluymen qūttyqtaimyn!
1957 jyly däl osy aradan jasandy Jer serıgı ūşyrylyp, ǧaryşty igeru däuırı bastaldy. Köp ūzamai, 1961 jyly ailaqtan tūŋǧyş ǧaryşker Iýrii Gagarin kök jüzıne attandy. Būl tarihi oqiǧa jahan jūrtşylyǧyn bırıktırıp, adamzattyŋ ǧylym men örkeniet progresıne degen senımın nyǧaitty. Sodan berı Baiqoŋyrdan myŋdaǧan Jer serıgı ūşyrylyp, ondaǧan missiia oryndaldy. Mūnda körnektı ǧalymdar, konstruktorlar men injenerler jūmys ıstedı. Ūly jetıstıkterdıŋ bastauynda tūrǧan barlyq mamanǧa şeksız rizaşylyǧymdy bıldıremın!»—dedı ol.
Prezident Qazaqstannyŋ halyqaralyq ǧaryşty igeru ısınıŋ belsendı müşesı ekenın atap öttı.
«Bız älemdegı eŋ ırı ǧaryş ailaǧynyŋ qazaq jerınde ornalasqanyn erekşe maqtan tūtamyz. Halqymyzdyŋ qaharman ūldary Toqtar Äubäkırov, Talǧat Mūsabaev jäne Aidyn Aiymbetov osy aradan kosmosqa attandy.
Elımız halyqaralyq ǧaryşty igeru ısınıŋ belsendı müşesı sanalady. «Baiqoŋyr» ailaǧy – Qazaqstan men Reseidıŋ dostyqqa, tatu körşılıkke jäne özara tüsınıstıkke negızdelgen ūzaqmerzımdı strategiialyq serıktestıgınıŋ jarqyn körınısı.
Soŋǧy onjyldyqtarda Qazaqstan ūlttyq ekonomikanyŋ damuyna yqpal etetın bırqatar auqymdy ǧaryş jobalaryn ıske asyrdy. Elımız Baiqoŋyrdy halyqaralyq yntymaqtastyqtyŋ, ǧylym men bılımnıŋ jäne turizmnıŋ ortalyǧyna ainaldyruǧa ūmtylady. Ǧaryş qyzmetınıŋ jaŋa naryqtaryna şyǧu, jas injenerlerdıŋ, konstruktorlar men ǧalymdardyŋ äleuetın arttyru jarqyn bolaşaqqa jol aşady»,—dedı Toqaev.
Memleket basşysy Baiqoŋyr qalasynyŋ tūrǧyndaryna airyqşa alǧys aitty.
«Sızder tabandy eŋbek etıp, ǧaryşty zertteu ısınıŋ ızaşarlarynan qalǧan mol mūrany mūqiiat saqtap kelesızder. Būl – zor qūrmetke laiyq. Ǧaryş salasy bükıl adamzatty ärdaiym ortaq maqsatqa jūmyldyryp, jaŋaşyldyq pen ǧylymi-tehnikalyq progreske bastaidy. Baiqoŋyr aldaǧy uaqytta da ūly jaŋalyqtar men ozyq innovasiialardyŋ qainar közı bola beredı dep senemın. Barşaŋyzǧa amandyq jäne tabys tıleimın!»—dep qorytyndylady prezident.
