«Aq jol» depýtattary memlekettik holdıngtardyń tabys dıvıdendiniń bıýdjetke aýdarymyn áldeqaıda ulǵaıtýdy talap etedi – bul týraly Azat Perýashev 2020-2022 jyldarǵa arnalǵan respýblıkalyq bıýdjetti talqylaý barysynda málimdedi.
«Bıýdjetti toltyrýdyń súbeli rezervin Samuryq-Qazyna» ál-aýqattyq qory, «Báıterek», «Qazagro» syndy memlekettik holdıng pen ulttyq kompanııalardyń tabysynan kórýge bolady».
Eger respýblıkalyq memlekettik kásiporyndar bıýdjetke dıvıdend esebinen 50%-ǵa deıin tabysyn bólip otyrsa, atalmysh mega-sýbektiler úshin múldem bólek parametrler belgilengen. Mysaly, 2018 jylǵy taza tabys kólemi «Samuryq-Qazynada» 821 mlrd teńge bolsa, «Báıterek» holdınginiki 80 mlrd teńgeni quraǵan. Sýbektilerdiń el ekonomıkasynyń 60%-n qurap otyrǵanyna jáne onyń kóp bóligi dál osy bıýdjetten keletinine qaramastan, olardyń jyl sońyndaǵy memleket paket akııalary dıvıdendi 19 mlrd teńge, ıaǵnı tabystyń 2%-yn ǵana quraǵan.
Taıaýda Úkimettiń bıýdjetti naqtylaý barysynda atalmysh dıvıdendterdiń 50 mlrd teńgege ósýi qýantarlyq dúnıe.
Sonyń ózinde bul memlekettik holdıngterdiń taza tabysynyń 10% ǵana quraıdy.
«Osyǵan oraı, «Aq jol» partııasy oryn alǵan máseleni qaıta qarap, kvazı memlekettik sektordyń bıýdjetke bólinetin dıvıdendin ulǵaıtýdy mindetteýdi suraımyn», − dedi Perýashev.
Partııa depýtattary memlekettiń azamattarǵa jan-jaqty áleýmettik qoldaý kórsetip jatqan kezinde, bıýdjetke kiristi kvazı memlekettik sektor tarapynan ulǵaıtý kerek dep esepteıdi.
«Aq jol» partııasynyń baspasóz qyzmeti
