26 qazanda tüsten keiın Nūr-Sūltanda "Astana" konsert zalynyŋ maŋynda polisiia on şaqty adamdy ūstap äkettı. Mūnda "oppozisiialyq qozǧalystyŋ mitingısı ötedı" dep būǧan deiın habarlanǧan. Arnaiy jasaq ökılderınıŋ bırneşe adamdy ūstaǧanyna Azattyq tılşısı de kuä boldy. Olardyŋ keibırı jäi jürgenın aityp, polisiianyŋ ūstauyna narazy boldy. Ūstalǧandardyŋ keibırı "Qytaiǧa jol joq" dep aiǧailady. Bırneşe adam qūjattaryn teksergen polisiia äreketıne aşulandy.
Azattyqtyŋ tıkelei efirın körıŋız:
Ūstauǧa bailanysty tüsınıkteme bergen Nūr-Sūltan qalalyq polisiia departamentı bastyǧynyŋ bırınşı orynbasary Baqytjan Malybaev "Äbliazov ūiymdastyrǧan mitingıge" bailanysty azamattarǧa eskertu jasalǧanyn, "poliseige qarsylyq körsetkenderdıŋ" ūstalǧanyn aitty.
Almatyda da polisiia Töle bi men Panfilov köşesınıŋ qiylysynda onnan astam adamdy ūstaǧan. Olardyŋ keibırı Qytai zauyttarynyŋ salynuyna qarsylyq bıldırıp, talabyn aita bastaǧan. Bıraq polisiia olarǧa pıkırın aiaqtatpady. Arnaiy jasaq "jäi jürmın" degen adamdardy da ūstady. Äkımdık qyzmetkerlerı "mitingı ornynda" jürgenderge tarau qajettıgın aityp eskerttı.
Azattyqtyŋ Şymkenttegı tılşısınıŋ habarlauynşa, mūnda da "Nauryz" alaŋynda polisiia üş adamdy ūstap alyp ketken. Olardyŋ bırı "Qytai ekspansiiasyna" qarsy ekenın bıldırıp, alaŋǧa sol pıkırın aitu üşın kelgenın aitqan. Oqiǧany tüsıru barysynda qara tüstı qolşatyr ūstaǧan ekı adam ūstaulardy kameraǧa tüsırgen Azattyq tılşısınıŋ jūmysyna kedergı keltırdı.
Būǧan deiın özın bilık opponentı retınde ataityn, şetelde jürgen quǧyndaǧy būrynǧy bankir Mūhtar Äbliazov 26 qazanda jaqtastaryn köşege şyǧuǧa şaqyrǧan. Qazaqstannyŋ bas prokuraturasy "rūqsat etılmegen mitingıge qatysu zaŋsyz" ekenın eskertıp, mitingıge şyqqan azamattardyŋ " qataŋ jazalanatynyn" habarlady.
"Azattyq" radiosy
