AITYSTYŊ ARDAQTYSY BOLǦAN JARQYNBEK BAUYRYM -AI!
Pendemız ǧoi. Ömırdı ötpestei köremız. Abyroiǧa, mol aqşaǧa, qyzmetke jetkımız keledı. Söitıp jürgende ömırdıŋ jalǧan ekenın de ūmytyp ketemız. Bes kündık fanidıŋ yryldasuǧa, bet jyrtysuǧa tatymaitynyn da esten şyǧaramyz. Tıptı, Astafuralla… Közımızdı şel basyp, Qūdaidy da ūmyta bastaimyz -au! Bıraq…
İä, bıraq… Kenetten eŋ aiauly jandardan köz jazyp qalǧanda, jaŋaǧy asqaqtyqtan tük qalmai, pende keipımızge qaita oralamyz. Qūdaidyŋ qūdıretın moiyndap, täubege kele qalamyz.
Sondai aiauly azamattyŋ bıregeiı, Saryaǧaştyŋ saŋlaǧy, bar Alaştyŋ ardaǧy, aitysker aqyn Jarqynbek Nauşabekovtyŋ auyr syrqattan köz jūmǧanyna da qyryq künge juyqtapty. Aldy artyna qaramai, zymyrap jatqan uaqyt.
Osy jazbany jazbas būryn Jäkeŋ turaly köp oilanyp, eske aldym. Bızder 2006 jyldan bır-bırımızdı bıluşı edık-au. Onyŋ aitysta eŋ «hit» bolǧan bır şumaǧy bar. Bırde qarsylasy Jarqynbektıŋ türıne tisıp, arzan qaljyŋmen mysqyldaidy ǧoi. Sonda Jarqynbektıŋ:
» — Qūdaidyŋ maǧan bergen türı ǧoi būl,
Soǧan bola uaiym jep pe edıŋız?
Türımdı emes, jyrymdy baǧalaidy,
Qazaq deitın qasiettı tektı elımız.
Joq älde, sen, jüz basty qatar qoiyp,
Işınen taŋdap aldy dep pe edıŋız?! «, -dep şulatyp edı -au.
2008 jyldary Saryaǧaşty su alǧanda Şymkentte bır aitysta auylynyŋ auyr halın aityp, aqyndyq jüregımen tolǧanyp edı-au!
Osy jazbany jazbas būryn köp oilandym. Jarqynbek dosymnyŋ är jyldardaǧy aitystaryn qarap şyqtym. Közıme tüskenderın ärine. Özınıŋ jerlesı Aqmaral Leubaevamen jekpe-jek aitysynda Oŋtüstıgın äbden jyrlapty. «Oŋtüstık jaman degenge, semserdei bolyp sermeldım» deptı. «Oŋtüstıktei el bar ma, Meiırımı jūmsaq maqtadan» deptı. Bır jerınde «Jyrlauǧa tarihyŋdy ǧasyr kerek» dep tuǧan ölkesıne degen qūrmetın, maqtanyşyn sezdırıptı. Baldyzy Äsem Erejeqyzymen aitysy da sättı şyqqan eken.
Oraldyq Mūradym Mirlanovpen 2018 jyly Şymkent qalasynda ötken Nauryzdaǧy aitystaryn da tyŋdap şyqtym. Soŋǧy aitysynyŋ bırı bolar dep, mūŋǧa battym. Mūradym bala söz arasynda: «Tırılmeidı adamnyŋ o düniege barǧandary» deptı. Jarqynbek tırı bolsa, mūndai sözder eleusız qalar edı ǧoi. Jarqynbektı joqtap, jüregım egılıp otyryp: «Būl söz nemenege aityldy eken?» dedım. Ol sözde tūrǧan eşteŋe joq qoi ärine. Bır tūsynda Mūradym:
«Mädeniet üiıne direktor bolypsyŋ,
Basyŋda däuren qanşa tūrar deisıŋ,
Jemqorlyqpen ūstalyp ketpe ( söz be söz emes, oi osyndai)» , deptı. Sonda Jarqynbek:
«Nesıne uaiym jedıŋ būlai bala,
Är sözıŋdı aitsaŋşy şyn oilana.
Direktor bolyp edıŋ şyqtyŋdar-au,
Menıŋ qyzmetımdı şyr ainala.
Qyzmet uaqytşa bılem ony,
Sondyqtan barlyǧyna şydaidy aǧa.
Pendeler taqta mäŋgı otyrmaidy,
Mäŋgılık bilık aitar Qūdai ǧana» , dep keremet sauatty jauap berıptı Jarqynbek.
Jarqynbek dos jaily endı ötken şaqpen söileimız. Özı madaqtap aita beretın Qūdaidyŋ jazuymen, mynau arsyz jalǧandy 44 jasynda tastady da kettı. Ol faniden baqiǧa öttı. Bıraq, aityskerlerdıŋ, özın jaqsy köretın janküierlerdıŋ köŋılınen ketken joq.
Erteŋ Türkıstan oblysy, Saryaǧaş audanynda aitysker aqyn, bırneşe respublikalyq, halyqaralyq aitystardyŋ bas jüldegerı Jarqynbek Nauşabekovtyŋ ömırden ötkenıne 40 kündık as berılıp, aiauly aqynǧa qūran baǧyştalady. Alla jazsa, baryp, jiynyna qatysyp, qol jaiyp qaituǧa niettımız.
Jatqan jerıŋ jaily bolsyn Jarqynbek dos!
Bız senı ūmytpaimyz!
Qazaq elı senı, senıŋ aitystaryŋdy eşqaşan ūmytpaidy!
JARQYLDAǦAN JARQYNBEKTI JOQTAU
(J.NAUŞABEKOVTYŊ RUHYNA ARNAIMYN)
KÖŊIL TOLQYNY
Toptyŋ bolǧan täuırı,
Joq Jarqynbek äz aǧa.
Aityskerler auyly,
Kezıktı auyr qazaǧa.
Istıŋ qalmai eş mänı,
Sekseuılsız qūmdardai.
Saryaǧaştyŋ aspany,
Mūŋǧa batyp tūrǧandai.
Köŋılım solai bop aldy,
Jat «habarymnan» şyǧar.
Ölımge qimas adamdy,
Joqtaǧanymnan şyǧar.
Jalynamyn Allam — ai,
Panaŋa alşy, keş künä.
Ötıp kettı jalǧan — ai,
Jarqynbeksız bes jūma.
«Baqūl bol» dep kübırlep,
Qūdıretke nanamyz.
Mäŋgılıkke tübınde,
Bärımız de baramyz.
Jaralǧan el baǧyna,
Ömırge ondai kelmeidı ūl.
Jarqynbektıŋ joǧyna,
Köŋıl älı senbei jür.
Atqarǧan ısı qily edı,
Tym auyr edı salmaǧy.
Bar Alaşqa syily edı,
Saryaǧaştyŋ saŋlaǧy.
Jürse daǧy qai tūsta,
Şyqty biık ızgı ünı.
Atandy ol aitysta,
Oŋtüstıktıŋ üzdıgı.
Ardaqty bop köp elge,
Talai — talai törge endı.
Qazaq jaman degenge,
Semser bolyp sermeldı.
Egız edı köktemmen,
Jan edı ol tektı, igı.
Ömırımızden ketkenmen,
Köŋılımızden ketpeidı.
Aqyn boldy ol – ırı,
Joq boluy – zor qaiǧy.
Aitystaǧy oryny,
Eşqaşanda tolmaidy.
**
Jalǧan ömır – qas qaǧym,
Ajal kelu – auyr ıs.
Saryaǧaştyŋ aspanyn,
Kernep tūrar saǧynyş!
8. 11.2019 jyl.
Eset DOSALY, Taraz.
