«Qasaqana öltırıldı»: Mysyrda Qazaqstan elşılıgınıŋ qyzmetkerı qaitys boldy

17.12.2019

4461

Suret Facebook jelısınen alyndy
Mysyrda Qazaqstan elşılıgınıŋ mädeniet bölımınıŋ ekınşı hatşysy qaitys boldy. Ol öz-özıne qol jūmsaǧan degen aqparat bar. Alaida tuystary būǧan senbei otyr. Sözderınşe, Elaman Joldasovty bıreuler qasaqana öltırgen. Ädıldık ızdegen bauyrlary Toqaevqa aşyq hat joldady, dep habarlaidy Neonomad.kz aqparattyq agenttıgı. 

Oqiǧa 13 jeltoqsanda Kair qalasynda bolǧan. Marqūmnyŋ bauyrynyŋ sözınşe, jūmys uaqyty kezınde Qazaqstan elşılıgınıŋ mädeniet bölımınıŋ ekınşı hatşysy Elaman Joldasovtyŋ qaitys bolǧany turaly suyq habar alady. Mysyr elınıŋ mamandary saraptamanyŋ qorytyndysy şyqpai jatyp, qazaqstandyqtyŋ öz-özıne qol jūmsaǧanyn aityp otyr.
«Naqtylai aityp ketetın bolsam 13 künı qasaqana öltırıldı degen mälımet alǧan bolatynbyz, aradan köp uaqyt ötpei 14 künı ekspertizanyŋ şeşımınsız öz-özıne qol jūmsady degen qisyŋǧa siǧysyz mälımet berılıp otyr. Elaman bauyrymnyŋ, bızge jetken mälımetter boiynşa, onyŋ aiaq qoly bailanǧanyn jäne de denesınde qan bolǧanyn kısı qolynan qasaqana öltırılgen belgılerı aiqyn körınıste tabylǧan. Jäne moinynda kürme bailanǧan jıp bolǧan, tıptı arqasynda jyryqtar bolǧany rastalady», – deidı marqūmnyŋ aǧasy.

Osy belgılerge qaramastan sol eldıŋ mamandary qazaqstandyqty suisid jasady dep otyrǧan körınedı. Aşynǧan bauyrlary endıgı ümıt el prezidentınde dep, aşyq hat joldady.

«Qūrmettı Qasym Jomart Toqaev,elı üşın jer asyp,ūlty üşın aianbai eŋbek etıp ,ılım men ǧylym jolynda jürgen bauyrymnyŋ ondai ıske barmastyǧyna senım bıldıre otyryp. Joldasov Elamannyŋ ölımı jönınde ädıl şeşım şyǧaruyn jäne öz qadaǧalauyŋyzda ūstauyŋyzdy ötınemız», dep jazady Nūrlan Joldasov.

Aita keteiık, Elaman Joldasovtyŋ ölımıne qatysty saraptamynyŋ qorytyndysy äzırge şyqqan joq.