Qazaqstandyq Moviq kinokompaniiasy gollivudtyq prodiuserler Keri Granat jäne Ed Djonspen bırge Ämıre Qaşaubaevtyŋ ömırı jaily film tüsıredı, - dep habarlaidy Tengrinews.kz tılşısı.
Kartinada belgılı änşı ärı akter Ämıre Qaşaubaevtyŋ şyǧarmaşylyǧynyŋ şyŋyna şyqqan kezeŋı baiandalady. Onyŋ Europany qazaq halqynyŋ än önerımen tanystyrǧan Keŋes odaǧynyŋ tūŋǧyş änşısı ekenı belgılı. 1925 jyly Parijde ötken EXPO-1925 körmesınde ol qazaqtyŋ "Aǧaş aiaq", "Qanapiia", "Jalǧyz arşa", "Üş dos" atty ūlttyq änderın oryndap, kümıs jülde alǧan edı. Filmge änşınıŋ oryndauyndaǧy segız än alyndy.
Moviq kinokompaniiasynyŋ ökılı Andrei Rasputinnıŋ aituynşa, filmnıŋ tüsırılım jūmystary säuır aiynda bastalady. Tüsırılım jūmystarynyŋ köbı Europa qalalarynda, keibırı Almatyda ötedı. Kartina qazaqstandyq, sonymen qatar, şeteldık prokatqa da şyǧady. Filmdı tüsıruge "Qazaqfilm" kinostudiiasy men QR Mädeniet jäne sport ministrlıgı qoldau bıldırdı.
Cast.kz ortalyǧy 1 jeltoqsannan bastap basty rolde oinaityn akterge kasting jariialady. Aita keteiık, "Ämıre Qaşaubaev" kartinasy aǧylşyn tılınde şyǧady, sondyqtan da basty role oinaityn akterge aǧylşyn tılın bılu talaby qoiylyp otyr.
Qaşaubaevtyŋ rolın oinaityn akterge qoiylatyn basty talaptar: jas şamasy 25-40 aralyǧynda bolu kerek, aǧylşyn tılın Upper Intermediate deŋgeiınde bılu, akterlık şeberlıgı joǧary, qazaq änderın şeber oryndau jäne dombyrada oinau.
Basty rolderge: aǧylşyn, qazaq tılderın jaqsy bıletın 55-65 jas aralyǧyndaǧy er adam; Mūstafa Şoqaidyŋ rolıne 30-40 jas aralyǧyndaǧy, aǧylşyn tılın bılu deŋgeiı Intermediate deŋgeiınen tömen bolmauy tiıs; 25-35 jas aralyǧyndaǧy, aǧylşyn tılın Intermediate deŋgeiınen kem bılmeitın äiel; 55-65 jas aralyǧyndaǧy akterlık qabıletı joǧary, aǧylşyn tılın bıletın äiel adam jäne 13-16 jas aralyǧyndaǧy aǧylşyn jäne qazaq tılderın jaqsy bıletın ūl bala kerek.
