Polisiia miting kezındegı tärtıp būzu äreketterımen küresudı jalǧastyrady. Işkı ıster ministrı Erlan Tūrǧymbaev osylai dep mälımdedı, dep habarlaidy Azattyq Rýhy Polisia.kz resursyna sılteme jasap.
Qazaqstannyŋ bırneşe qalasynda sanksiialanbaǧan miting ötkızu jäne oǧan qatysu äreketterı tırkelıp otyr. Bas prokuraturanyŋ bırneşe ret eskertkenıne qaramastan kei azamattar elımızde tyiym salynǧan ekstremistık ūiymnyŋ ūrandaryna senıp, alaŋǧa şyǧady. Olar kölık qozǧalysyna kedergı jasap, jolda kollaps tuǧyzuǧa tyrysady. Tärtıptıŋ saqtaluyn qadaǧalap jürgen qyzmetkerlerge küş körsetedı.
«Mūnyŋ bärı azamattardyŋ qauıpsızdıgı men tynyştyǧyna qauıp töndıredı»,-dedı Erlan Tūrǧymbaev öŋırlık polisiia departamentterı jäne qūrylymdyq bölımşe basşylarymen ötken jiynda.IIM basşysy sondai-aq, Qazaqstan polisiiasynyŋ basty mındetı – halyqtyŋ beibıt ömırı men tynyştyǧyn qamtamasyz etu ekenın atap öttı.
«Polisiia üşın eŋ bastysy – qauıpsızdık pen qoǧamdyq tärtıp. Zaŋǧa qūlaq asatyn azamattarǧa alaŋdaityn eşteŋe joq. Bıraq mitingke jūmysqa barǧandai baratyn kei azamattar alaŋdatady. Olar arandatuşylardyŋ yqpalynda, sondyqtan beibıtşılık pen tūraqtylyq – bızdegı eŋ qūndy närse ekenın, ony barynşa baǧalau kerektıgın tüsınbeidı. Sol üşın polisiia aldaǧy uaqytta da el qauıpsızdıgı üşın qyzmet etpek. Qazaqstan halqynyŋ tynyş ärı beibıt tırşılıgın qorǧau - bızdıŋ negızgı mındetımız», - deidı Işkı ıster ministrı.Vedomstvo basşysynyŋ aituynşa, qūqyq qorǧau organdarynyŋ qyzmetkerlerı qoǧamdyq tärtıptı būzu äreketıne qarsy kürestı jalǧastyra bermek. Ol qaramaǧyndaǧy basşylarǧa polisiia qyzmetkerlerın zaŋǧa qaişy, arandatuşylyq äreketterden qorǧaudy tapsyrdy.
