Au, şyraq, mynau ne baǧa?

Täşken pomidory 3 myŋ, alma 1800, kartop 260, banan 2 myŋ, qymyz myŋ teŋge. -Au, şyraq, mynau ne baǧa? Qazaqtyŋ basyna kün tua qalsa, (Qūdai onyŋ jolyn ärmen qylsyn) 30jyl eldı jalmaǧan jemqor jalmauyzdarǧa ūqsap eldı eŋ bırınşı bolyp sender qūrtatyn şyǧarsyŋdar. Öz qazaǧyŋnyŋ jaǧdaiyna üŋılıp, appetitterıŋdı kışkene tyisaŋdarşy",-dep söilep kettım üidıŋ janyndaǧy kökınıs satatyn saudagerge. Joǧarydaǧylar asap jese, tömendegıler tıstep jeidı, sonda äupırımmen kün körgen qalyŋ qazaqtan ne qalady? Adamnyŋ köz jasy men halyqtyŋ nalasynan aqşa jasauǧa arlanbaǧan azǧyndar aqyl aitady taǧy jūrtqa: "panikerler koronovirus sekıldı memleketke qauıptı" dep. Azǧantai ailyǧyna küneltıp - künkörıp jürgen köptıŋ köz aldynda teŋgesı teŋselıp, azyq-tülık baǧasy aspandap bara jatsa, kedeilıkten zyǧyry şyqqan el paniker bolmaǧanda qaitedı? Indetten qorǧanu üşın 2 saǧat saiyn 150 teŋgelık maskasyn kündelıktı 6 ret auystyryp tūru üşın aptasyna 5400 teŋge kerek eken. Bır aida bır adam özın-özı maskamen qamtu üşın 21 myŋ jūmsauy qajet. Qazaq panikaǧa tüspei qaitedı? Genınde qasaqana jasalǧan aştyqtyŋ üreiı saqtalǧan qazaq öre türegelıp azyq-tülık satyp almai qaitedı? Tuystyq klannyŋ qamyn küittep elge ne qadyry, ne senımı qalmaǧan bilıgı bar halyq paniker bolmai qaitedı? Alaŋdap qalǧan eldı koronovirusqa teŋegenı qai sasqany? Būl ne zırkıl özı? Naǧyz koronovirus - halyqtyŋ aŋǧaldyǧy men nesıbesınen aqşa tapqan jemqorlar men azyq-tülıktı on ese üstemelegen alyp-satarlar! "Qalada keşe sirena dabyl qaqqanda tūla-boiym qaltyrap kettı. Baǧa mynau, bala anau, halyqty basudyŋ ornyna zırk-zırk etken bilık, "magazindı solaiymen köterıp ketıptı" dep köpke qarq-qarq külgen äleumettık jelı. Ömırden tüŋılıp kettım, apokalipsis jaqyndap qaldy ma?!", -dep körşımnıŋ közı mölt-mölt etedı... İä... Mynau ındet ainaldyrǧan bırneşe aida "mirovoi poriadokty" qana özgertken joq, küllı adamzatqa oi saldy. Özımız elemei jürgen esıl erkındıktıŋ qadyr-qasietın sezındık. Qauıpsızdık - beiǧam tırşılıktıŋ tıreuı ekenın ūqtyq. Adamzattyq ainalymǧa enıp ketken jahandanu prosessınıŋ alyp quatyn, odan qanşa oqşaulansaq ta ony kerı qaitaru mümkın emestıgın, "kemedegınıŋ jany bır" ekenın, jer planetasynyŋ - ortaq, tūtas ekenın ūǧyndyq. Äitpese, älemdık ǧalymdardyŋ koronovirusqa qarsy äzırlep jatqan ekpesın emeşegımız üzıle kütpes edık qoi. Būl oqiǧa: -adasqandardy raiynan qaitaratyn amal, -ömırden tüŋılgender üşın körıngen säule, -artta qalǧandardy alyp keter poiyz, -jolda qalǧandarǧa salynǧan köpır, -bärınen küder üzgenderge aşylǧan esık! Adamzattyq örkeniettı tek qana tehnologiialyq progress pen materialdyq qūndylyqpen ölşep keldık. Al mynau dünienı töŋkerıp jıbergen ǧalamdyq ındet adamzattyŋ densaulyǧynan artyq mūrat joq ekenın taǧy bır aiǧaqyndap berdı! Būl ındet qoldan jasalǧan biologiialyq qaru ma, älde qauıpsız tırşılıktıŋ qadyryn ūqsyn dep Qūdaidyŋ adamǧa jıbergen zaualy ma? Ol jaǧyna bas qatyrǧym kelmeidı. Öitkenı, kez-kelgen dünienıŋ syry erte me, keş pe aşylary haq jäne dünienı dür sılkındırgen osynau oqiǧa adamzat näsılınıŋ miyna jaŋa fail jüktedı dep sengım keledı. Jaratqannyŋ ämırı aldynda adam atauly älsız ekenın taǧy ır däleldedı! Adamzat ruhani kemeldılıktıŋ kelesı bır satysyna ötpek. Qazırgı dürbeleŋ ruhani evoliusiialyq sekırıs aldyndaǧy "perezagruzka" dep özımdı sendıremın. Bärı jaqsy bolady! Būryn "qazaǧym aman bolsyn" dep Alladan jalbarynyp sūrauşy edım (populist dep sökseŋızder öz erıkterıŋız), qazır tılegım men jüregım özgerdı! Adamzat aman bolsyn!