Reseide soŋǧy bır künde 71 adamnan koronavirus tabyldy. Būl turaly premer-ministr Mihail Mişustin habarlady. Elde virus jūqqandar sany 438 adam boldy.
Koronavirus jaǧdaiyn baqylau jönındegı şūǧyl ştabynyŋ deregınşe, dertke jaŋadan şaldyqqandardyŋ barlyǧy Mäskeuden anyqtalǧan.
Mişustin nauqastarmen bailanysta bolǧandardy anyqtaudyŋ yŋǧaily jüiesın qalyptastyrudy tapsyrdy. Premer-ministrdıŋ pıkırınşe, ūialy bailanys operatorlarynyŋ deregın osy maqsatta paidalanuǧa bolady.
Ol sonymen bırge egde adamdardy üiden şyqpauǧa şaqyrdy.
Mäskeu merı Sergei Sobianin 26 nauryz ben 14 säuır aralyǧynda 65 jastan asqan qala tūrǧyndary men sozylmaly auruǧa şaldyqqan adamdar üide otyruy tiıs dep aitty. Merdıŋ resmi saitynda osy turaly arnaiy jarlyq mätını de jariialandy.
Oǧan säikes, jūmys beruşıler qyzmetkerlerın qaşyqtan jūmys ısteuge köşıruı tiıs nemese tölenetın demalysqa jıberuı kerek. Tek öte maŋyzdy käsıporyn men mekemeler, densaulyq saqtau salasy qyzmetkerlerı ǧana jūmysyn jalǧasa beredı.
Üide karantinde otyrǧandarǧa 4 myŋ rubl (şamamen 50 dollar nemese 22 myŋ teŋge) kölemınde bır rettık kömek berıledı. Jartysy karantinnıŋ basynda, jartysy aiaǧynda tölenedı. Kommunaldyq tölemderdı keşıktırgen tūrǧyndardyŋ tölemıne ösımaqy qosylmaidy.
23 nauryzdan bastap Resei koronavirusqa bailanysty Türkiia, Tailandqa qatynaityn ūşaq reisterın azaitqan. Qazır būl elderge tek Mäskeuden ǧana ūşuǧa bolady. Būǧan deiın "Aeroflot" äue kompaniiasy Europanyŋ bırqatar elıne reisterdı şektegen.
Älemde Covid-19 koronavirusy 336 myŋnan astam adamǧa jūqty. Qaza bolǧandar sany 14 myŋnan asyp kettı. Virus 180-nen astam elge tarady. 98 myŋnan astam adam dertten aiyqqan.
"Azattyq" radiosy
