Koronavirus qaljyŋdasatyn ındet emes. Beiqam İtaliianyŋ taǧdyry bızdı oilandyrsa kerek edı. Saltqa jüirık, dästürge berık Qazaq aldymen saqtyq şaralaryn şiratuy tiıs edı. «Saqtansaŋ saqtaidy»,- dep aityp edı ǧoi, atalarymyz.
Qazır tötenşe jaǧdai. Sanaǧa jetetındei aq aitylyp jatyr. Saltyŋ da bar. Tas tüsken jerge auyr. Taǧdyryŋ tasty tastaǧan eken, kez kelgen qiyndyqqa tas tüiın daiyn boluymyz kerek edı. Memleket erıkkennen karantin jariialamaǧan şyǧar. Nege bosyp jürmız, älı? Anau beketterden ebın tauyp, ötıp ketıp elge baryp, kelıp jürgender bar deidı. «Olardyŋ aiaǧyn syndyr», - deuşı edı, baiaǧynyŋ aqsaqaldary. Qazır ainalasy älgılerdıŋ tapqyrlyǧy men tıl tabysuşylyq qasietıne riza. «Oiynyŋ osylar», - degendı de qazaq aitty. Küiıngennen soŋ. Anau qulardyŋ tastap ketetın tört-bes myŋ teŋgesı qai jyrtyǧyŋa jamau, bekettı aşyp beruşı bauyr? Kamera körmei qalǧan şyǧar, tekseruşı baiqamai qalǧan şyǧar, bıraq sız myrzalyq tanytqan sol adam virus tasymaldauşy bolsa şe? Qai auylyŋda jıbı tüzu auruhana bar edı? Qai auruhanasynda tolyp tūrǧan därı-därmek qoimasyn körıp edıŋder? Bıreuı torqaly toi dep ötedı-mıs, ekınşısı topyraqty ölımge asyqqan. Quanyşy qūtty bolsyn, ölgenıne iman tıledık. Qazır qūtty bolsyn nemese köŋıl aitatyn kez emes qoi.
Ūstazym Nes-aǧa «Auyldy saqtau» kerek dep aiqai saldy. Dauysy qai jerge deiın jetkenın bılmedık. Tym bolmasa sol auylǧa özımız saq bolaiyqşy. Barmaiyqşy, auylǧa. Auylǧa däl qazır bızdıŋ tük paidamyz timeidı. Qydyrǧanyŋdy da köterer, alaida qauıp aparǧanymyzdan qapersız ǧoi. Aqedıl adamdar olar, bauyr keldı dep baryn salady. Asyn beredı. Janyn salyp, kütedı. Sol köŋılın viruspen bylǧap ketsek şe?
Auylda bärı bar. Niettes adamdar, bauyrmal halyq. Bıraq, auylda qazır anau aitqandai maman därıger tapşy. Bar da şyǧar, bıraq ştat az ǧoi. Tym az. Olar älgı bäle beleŋ alyp ketse qalai alysady? Nesımen alysady? Qapersız bolmaiyqşy, aǧaiyn, qanypezer emespız ǧoi. Barmaiyqşy auylǧa. Bekettı ainalyp ötuge bolady. Ol üşın keremet aqyl da qajet emes. Ebın bılesız de, eptep kete beresız. Sanaǧa säule tüsıreiıkşı.
Barmaiyqşy, auylǧa! Barmaŋyzdarşy, bır-ekı ai...
Aman SEIITQANOV
