10 säuır künı Aqtöbede jedel järdem feldşerlerı "tötenşe jaǧdai kezınde qosymşa aqy almadyq" dep narazylyq bıldırdı. Narazy elu şaqty qyzmetker qalalyq jedel järdem beketı jinaldy.
- Elde tötenşe jaǧdai jariialanǧan kezde jedel järdem beketınıŋ basşylyǧy "bärıŋe qosymşa aqy tölenedı" dedı. Bızdıŋ oǧan eş kümänımız bolmady. Öitkenı är künımız qauıp-qaterge toly. Käsıbi mındetımız bolǧandyqtan ärı qosymşa aqy tölenedı degennen keiın kün saiyn täuekelge baryp jürmız. Bügın, 10 säuırde nauryz aiynyŋ jalaqysyn aldyq. Qosymşa aqy tölenbeptı. Bız osyǧan narazymyz, - deidı feldşer Möldır Mataiupova.
Narazy toptyŋ sözıne qaraǧanda, jedel järdemde COVID-19 dertıne qarsy 24 brigada jasaqtaǧan. Özın Maqsat dep tanystyrǧan feldşer "Koronavirusqa bailanysty jasaqtalǧan brigadaǧa kırmesek te, viruspen jedel järdemnıŋ kez-kelgen brigadasy tap keluı mümkın. Sondyqtan bärıne bırdei ötemaqy tölenuı tiıs" dep sanaidy.
Al Aqtöbe oblysy densaulyq saqtau basqarmasy narazylyq bıldırgen jedel järdem qyzmetkerler “koronaviruske bailanysty qūrylǧan arnaiy 24 brigadada emes, sondyqtan ötemaqy tölenbedı” dep mälımdedı.
- Koronaviruspen küresuşı medisina qyzmetkerlerı qauıptıŋ deŋgeiıne bailanysty üş kategoriiaǧa bölıngen. Bırınşı kategoriiaǧa infeksionist därıgerler, reanimatologtar engen. Olardyŋ virus jūqtyru qaupı asa joǧary. Jedel järdem ekınşı kategoriiaǧa jatqyzylǧan. Jedel järdemnıŋ özınde virus jūqtyru qaupı joǧary arnaiy jasaqtalǧan brigadalar bar. Qosymşa tölemdı solarǧa berdık. Arnaiy brigadalardyŋ özı jüktemesıne qarai 100, 200, 300 myŋ teŋgeden qosymşa aqy aldy. Oblysta 425 myŋ teŋge alǧan bırde-bır därıger joq. Bız densaulyq saqtau ministrlıgınıŋ būiryǧyna säikes äreket ettık, - deidı Aqtöbe oblystyq densaulyq saqtau basqarmasy basşysy Äset Qaliev.
Aqtöbe oblystyq densaulyq saqtau basqarmasynyŋ mälımetınşe, oblysta 854 medisina qyzmetkerı koronaviruspen küreske jūmylǧan. Onyŋ 120-y jedel järdem beketterınde jūmys ısteidı. Aqtöbe oblysynda 11 adamnan koronavirus tabylǧan. Bır tūrǧyn dertten aiyqty.
30 nauryzda Qazaqstan ükımetı viruspen küresıp jatqan därıgerlerge qosymşa ötemaqy taǧaiyndalǧan. Soǧan sai, “qauıptılıgı asa joǧary top” - reanimasiia bölımderın qosa alǧanda jūqpaly aurular stasionarynyŋ därıgerlerı, orta jäne kışı medisina qyzmetkerlerınıŋ jalaqysyna 850 myŋ teŋge kölemınde üstemaqy qosylady. "Qauıptılıgı joǧary top" - provizorlyq stasionar men jedel järdem qyzmetınıŋ därıgerlerı, orta jäne kışı medisina qyzmetkerlerınıŋ jalaqysyna aiyna 425 myŋ teŋge qosylady. "Qauıptılıgı ortaşa top" - karantindık stasionar därıgerlerı, orta jäne kışı medisina qyzmetkerlerı sanitarlyq därıgerler, jedel järdem jürgızuşılerınıŋ jalaqysyna aiyna 212 myŋ teŋge qosylady.
"Azattyq" radiosy
Foto: "Azattyq" radiosy
