QR Syrtqy ıster ministrlıgı «Aq jol» partiiasynyŋ ūsynysyn BŪŪ-nyŋ jemqorlardyŋ ofşorlarǧa jıbergen halyq aqşasyn qaitaru jönındegı arnaiy jūmys tobyna qarastyruǧa jıberetın bolady. Būl turaly QR Syrtqy ıster ministrı M.Tıleuberdı partiia töraǧasy A.Peruaşevtıŋ hatyna joldaǧan jauabynda habarlady.
Belgılı bolǧandai, osy jyldyŋ basynda Bırıkken Ūlttar Ūiymy jemqorlardyŋ ofşorlarǧa şyǧarǧan halyq aqşasyn qaitaru jönındegı arnaiy toptar qūratyny turaly jariialaǧan bolatyn.
Osyǧan orai, «Aq jol» QDP deputattyq fraksiiasy QR SIM-ne BŪŪ-nyŋ qūryp jatqan mūndai arnaiy toptaryn mümkındıgınşe paidalanudy, iaǧni toptardy qūruǧa belsene qatysuǧa, sondai-aq onyŋ jūmysyna Parlament deputattaryn, osy salada täjıribesı bar «Aq jol» Demokratiialyq partiiasynyŋ da ökılderın qatystystyrudy ūsynǧan bolatyn.
Partiianyŋ osy jyldyŋ 5 aqpanynda jasaǧan deputattyq saualynda «Jemqorlyqty joiu jäne halyqtan ūrlanǧan milliardtaǧan qarajatty elge qaitaru «Aq jol» Demokratiialyq partiiasynyŋ basym baǧyttarynyŋ bırı. 2012 jyldan bastap partiia būl mäselenı onnan asa deputattyq saualdaryna arqau ettı. «Aq jol» QDP fraksiiasy Kiprden (2013 jyly), Şveisariiadan (2015 jyly), «Panama tızımı» (2016 jyly) jäne «Raiskoe dose» (2017 jyly) jaǧdailary boiynşa qazaqstandyq qarajattyŋ elge qaitaryluynyŋ naqty mäselelerın köterıp keledı» dep atap ötılgen.
A.Peruaşev «Aq jol» Demokratiialyq partiiasynyŋ deputattary ofşorlarǧa şyǧarylǧan halyq aqşasyn qaitaru mäselesın memlekettık organdarmen ǧana emes Evroparlament müşelerımen jäne Briussel, Siurih, Pekin, Riga, Singapur jäne taǧy basqa elderdegı ärıptesterımen ötken kezdesulerde talqylaǧanyn da jetkızdı.
Aǧymdaǧy jyldyŋ 16 nauryzy künı A.Peruaşev QR SIM-ne qūrylatyn Joǧary deŋgei toby erejelerınıŋ proseduralary jobasy boiynşa özınıŋ ūsynystaryn joldady. Onyŋ oiynşa, atalǧan jobaǧa qarjylyq esepten bölek jemqorlardyŋ halyqtan zaŋsyz ūrlaǧan qarajattaryn anyqtau jäne olardy şyǧaru joldaryna tosqauyl qoiu, sonymen bırge mūndai aqşalardyŋ elge qaitarylu joldary men naqty ıs-şaralaryn äzırleudı engızu qajet.
«Aq jol» partiiasynyŋ jetekşısı «Qazır däl osy baǧyttaǧy mäsele maŋyzdy. Keibır elderdıŋ halyqtan ūrlanǧan qarajattardy, sol halyqqa qaitaruǧa qyzyǧuşylyq tanytpaityny baiqalady» - dep sanaidy. Osyǧan orai, ol «Maqsattar», «Top şeŋberınde boluy qajet:», «Paneldık pıkırtalas qatysuşylarynyŋ rölı» taraularyna tiıstı ūsynystardy engızudı ūsyndy.
QR SIM-nen kelıp tüsken hatta BŪŪ-nyŋ atalǧan Jūmys toby 15 adamnan qūrylatyny belgılı boldy. Qatysuşylardyŋ tepe-teŋdıgın saqtau maqsatynda Aziia – Tynyq mūhity aumaǧynan 3 qatysuşy ǧana Jūmys tobyna kıredı.
«Osyǧan orai, Top qūramyna qazaqstandyq ökılderdıŋ engızıluı mümkın emes» - dep habarlaidy QR Syrty ıster ministrı M. Tıleuberdı.
Alaida, QR Syrtqy ıster ministrlgı Top qyzmetınıŋ jūmysyn qadaǧalai otyryp, Qazaqstan tarapynyŋ ūsynystaryn Toptyŋ qarauyna jıberudı jalǧastyrady dep atap öttı.
"Adyrna" ūlttyq portaly
