Qūrama Ştattar prezidentı Donald Tramp Düniejüzılık densaulyq saqtau ūiymy (DDŪ) koronavirus pandemiiasymen küreste därmensız boluyna bailanysty ūiymnyŋ biudjetıne jarna töleudı toqtata tūruǧa būiryq bergenın mälımdedı. Būl turaly QazAqparat VVS agenttıgıne sılteme jasap habarlaidy.
«Şynaiy jaǧdai bylai, Düniejüzılık densaulyq saqtau ūiymy aqparatty jetkılıktı därejede alyp otyrmady, teksermedı jäne ony uaqytyly jäne aşyq türde jariialamady. Älem elderı Düniejüzılık densaulyq saqtau ūiymy densaulyqqa tönetın halyqaralyq qauıp turaly naqty aqparattardy uaqytyly taratyp otyratynyna ümıttenedı. Al eger olai bolmasa oryn alyp jatqan jaǧdai turaly öz betımen jetkızedı. DDŪ atalǧan negızgı mındetın oryndamady jäne jauapkerşılıkke tartyluy kerek. Ondaǧan jyldardan keiın uaqyt jettı», - dedı Tramp Aq üidegı baspasöz mäslihatynda.
Prezidenttıŋ aituynşa, BŪŪ agenttıgı qytailyq jalǧan aqparatty taratqan. Būl, epidemiianyŋ anaǧūrlym auqymdy saldaryna alyp kelgen. Osylaişa, D. Tramp Qytaida paida bolǧan virustyŋ ǧalamşar boiynşa taralyp ketu oqiǧasynda DDŪ-nyŋ rölı anyqtalǧanǧa deiın qarjylandyrudy toqtata tūruǧa nūsqau berdı.
Aita keteiık, AQŞ – DDŪ-nyŋ eŋ ırı qarjylandyru közı. Tek ötken jyldyŋ özınde ǧana olardyŋ jarnasy 400 mln dollardy, iaǧni ūiym biudjetınıŋ 15% qūraǧan bolatyn. Al BŪŪ Bas hatşysy Antonio Guterreş qazır Düniejüzılık densaulyq saqtau ūiymynyŋ nemese viruspen küresetın basqa da gumanitarlyq ūiymdardyŋ qyzmetı üşın resurstardy qysqartatyn uaqyt emes ekenın mälımdedı.
«Qazır – būl virusty jäne onyŋ epidemiialyq saldaryn joiu üşın halyqaralyq qauymdastyqtyŋ bırlesıp jūmys jasau uaqyty», - dedı BŪŪ Bas hatşysy.
Ūqsas jaŋalyqtar
