Qytaıdyń syrtqy ister mınıstrliginiń ókili Chjao Lızıan koronavırýs Ýhandaǵy zerthanada jasandy jolmen paıda boldy degen aqparatty teriske shyǵardy. Bul týraly Reuters agenttigine silteme jasap, centralasian.org jazdy.
«Dúnıejúzilik densaýlyq saqtaý uıymynyń ókilderi koronavırýstyń zerthanada jasalǵany boıynsha eshqandaı dálel joqtyǵyn birneshe ret aıtty. Sarapshylar da vırýs jasandy jolmen paıda boldy degen boljamǵa negiz tappady»,- dedi Lızıan.
Osyǵan deıin amerıkalyq Fox News telekanaly anonımdi bulaqtaryna súıenip, koronavırýsty alǵashqy bolyp juqtyrǵan adam Qytaıdyń Ýhan qalasyndaǵy zerthanada jumys istegen degen málimet taratty. Telekanaldyń reportajynda koronavırýs bıologııalyq qarý bolmaǵanyn, biraq Qytaı vırýstardy anyqtaý jáne olarǵa qarsy kúreste AQSh-tyń aldyna shyǵýǵa áreket etken dep aıtylady.
16 sáýirde CNN telekanaly osyǵan baılanysty Amerıka vırýs zerthanada jasalǵan degen boljam boıynsha zertteý bastaǵanyn habarlaǵan.
Osyǵan deıin AQSh-tyń memlekettik hatshysy Maık Pompeo vırýstyń Ýhannan shyqqanyn, qaladaǵy teńiz jándikteri satylatyn bazardan birneshe shaqyrym jerde Vırýsologııa ınstıtýty bar ekeni ǵana belgili ekenin aıtqan.
Qytaı basylymdary koronavırýsty alǵash Ýhandaǵy bazarda teńiz jándikterin satqan áıel juqtyryp alǵanyn málimdep keledi.
Aqpan aıynda Nature ǵylymı jýrnalyna koronavırýstyń genomynda zerthanada jasandy jolmen ósiriletin belgileri tabylǵany týraly maqala jarııalaǵan.
