Almatydaǧy tergeu izoliatorynda Qordaidaǧy tärtıpsızdıkterge qatysqan küdıktı qaitys boldy, dep habarlaidy "Adyrna" Bas prokuraturanyŋ baspasöz qyzmetıne sılteme jasap.
"2020 jyldyŋ 29 säuırı taŋǧy saǧat 08.00-de Almaty qalasynyŋ tergeu izoliatorynda qamauǧa alynǧan azamat Kibaev Bekbol Muhamedovich sol qolynyŋ bılek tūsy kesılgen küiınde därethanadan tabyldy. Ony kamerada bırge otyrǧandar tapqan", - delıngen aqparatta.
Oǧan izoliatordyŋ medisina qyzmetkerlerı bırden alǧaşqy medisinalyq kömek körsetkenımen, ömırın saqtap qala almady.
Şaqyrtu boiynşa kelgen jedel järdem onyŋ qaitys bolǧanyn tırkedı. Ölımnıŋ aldyn ala sebebı köp qan joǧaltu boluy mümkın delıngen.
"Kibaev Bekbol Jambyl oblysy Qordai audanyndaǧy jappai tärtıpsızdıkke qatysqany üşın ūstalyp, tergeu izoliatoryna qamauǧa alynǧan bolatyn",- delıngen aqparatta.
Oqys oqiǧa boiynşa Almaty qalasynyŋ arnaiy prokurorlary sotqa deiıngı tergep-tekseru jūmystaryn jürgızıp jatyr.
Esterıŋızge sala ketsek, Jambyl oblysynyŋ Qordai audanynda 7 aqpanǧa qaraǧan tünı jappai töbeles boldy. Qaiǧyly oqiǧa saldarynan on bır adam qaza boldy delıngen resmi mälımdemede.
"Adyrna" ūlttyq portaly
