QR Prezidentı Qasym-Jomart Toqaev Parlament Senatynyŋ otyrysyna qatysty. Söilegen sözınıŋ tolyq mätını:
Qūrmettı Senat deputattary!
Bız bügın erekşe jaǧdaida kezdesıp otyrmyz. Qazır bükıl älem jūrtşylyǧy kürdelı daǧdarysqa ūşyrady. Mūny jaqsy bılesızder. Koronavirus dertı Qazaqstandy da ainalyp ötken joq. Soǧan bailanysty halqymyz on altynşy nauryzdan bastap tötenşe jaǧdaida ömır sürude. Karantin rejimı azamattarymyzǧa aitarlyqtai qiynşylyq tuǧyzdy. Degenmen, bükıl elımız osy ındetke qarsy küresu üşın jūdyryqtai jūmyla bıldı. Äsırese, därıgerler, äskeri qyzmetşıler, poliseiler, volonterler kün-tün demei jūmys ısteude. Olardyŋ bärı Otanǧa adal qyzmet etudıŋ ozyq ülgısın körsettı. Syn saǧaty qasiettı Ramazan aiymen tūspa-tūs keldı. Halyqtyŋ jıgerın qairap, tözımın şyŋdauǧa mūnyŋ da äserı boldy. Bız der kezınde qolǧa alynǧan şaralardyŋ arqasynda ındettıŋ jappai taraluyna tosqauyl qoidyq. Mūny Düniejüzılık densaulyq saqtau ūiymy, halyqaralyq sarapşylar joǧary baǧalady. Pandemiia el ekonomikasyna kerı äserın tigızıp otyr. Osyǧan orai, Ükımet azamattarǧa, şaǧyn jäne orta biznes ökılderıne qoldau körsetude. Biudjetten qomaqty qarajat bölındı. Tabysynan aiyrylǧan adamdar qarjylai kömek alyp jatyr. Mūnyŋ bärı halyqtyŋ tūrmys jaǧdaiyn tömendetpeu üşın jasaluda. Qabyldanǧan şaralar öz nätijesın bere bastaǧanyn körıp otyrmyz. Jaǧdai kürdelenıp ketpese, tötenşe jaǧdai rejimı on bırınşı mamyrda aiaqtalady. Bıraq karantin rejimıne bailanysty ıs-şaralar jalǧasa beredı. Būl el tūrǧyndarynyŋ qauıpsızdıgı üşın asa qajet. Azamattarymyz bırte-bırte qalypty ömırge qaita oralady dep senemın. Qūrmettı deputattar! Bızdıŋ ūzaq merzımdı strategiialyq damu jolymyz bar. Qandai qiyndyq bolsa da, Elbasymyzdyŋ strategiiasyn jüzege asyramyz. Būl – saiasi sabaqtastyqty saqtau degen söz. Täuelsız Qazaqstannyŋ Tūŋǧyş Prezidentı – memleketımızdıŋ negızın qalauşy, älemdık deŋgeidegı tarihi tūlǧa. Mūny eşqaşan ūmytpauymyz qajet. Sondai-aq, öskeleŋ ūrpaqqa tüsındırgenımız jön. Bız daǧdarystan keiıngı kezeŋge qazırden bastap daiyndaluymyz kerek. Qandai kürdelı jäne qauıptı bolsa da, daǧdarys – ötpelı närse. Ol jaŋa mümkındıkterge jol aşady. Sondyqtan Elbasy jiyrma törtınşı säuırde Qauıpsızdık keŋesınıŋ otyrysynda keleşektegı ekonomikalyq strategiiamyz jönınde aityp, aiqyn baǧdar körsettı. Men jiyrma jetınşı säuırde arnaiy mälımdeme jasadym. Ükımet pen äkımderdıŋ aldyna naqty mındetter qoidym. Osyǧan orai keşendı ıs-qimyl baǧdarlamasy bar dep kümänsız aituǧa bolady. Ony eşqandai qosymşa mälımdemelermen tolyqtyrmai jüzege asyrǧan jön. Qazır Ükımet pen Ūlttyq bank Ekonomikalyq damudy qalpyna keltıru üşın jūmys jürgızude. On bırınşı mamyrǧa deiın arnaiy jospar daiyndalmaqşy. Ekonomikada tübegeilı reforma jürgızuımız kerek. Būl – asa kürdelı mındet. Eŋ aldymen, ekonomikalyq ösımdı qalpyna keltırıp, halyqtyŋ äl-auqatyn arttyru qajet. Bız osy pandemiiadan sabaq aluymyz kerek. Keibır salalarda kemşın tūstarymyz bar. Mūny ındetten tuyndaǧan ahual anyq aŋǧartty. Sondyqtan, alda tūrǧan bırqatar mındetterge nazar audarǧym keledı. Bırınşı kezekte densaulyq saqtau jüiesıne basa män bergen jön. Būl salany jaŋǧyrtu üşın tyŋ bastamalardy qolǧa aluymyz qajet. Zaman talabyna sai auruhanalar salyp, qajettı qūral-jabdyqpen qamtamasyz etu asa maŋyzdy. Būdan bylai medisina ǧylymyn damytuǧa erekşe köŋıl böluımız kerek. Osy salada eŋbek etıp jürgen ǧalymdarymyzdyŋ äleuetı zor. Mamandarǧa laiyqty jaǧdai jasap, naqty qoldau körsetken abzal. Sonymen qatar bılım jäne ǧylym salasyn tolyǧymen jaŋǧyrtatyn bolamyz. Osy rette ozyq tehnologiialar men sifrlandyrudy keŋınen qoldanuymyz kerek. Būl – basty mındetterdıŋ bırı. Bız bäsekege qabılettı ūlt qalyptastyru üşın adami kapitaldy damytuymyz kerek. Būl – strategiialyq maŋyzy bar mındet. Öitkenı Qazaqstannyŋ bolaşaǧy bılımdı ärı bılıktı azamattardyŋ qolynda. Memleket tötenşe jaǧdai kezeŋınde mūqtaj jandardy erekşe qamqorlyqqa aldy. Mūndai ıs-şaralar, tıptı, damyǧan memleketterde de bolǧan joq. Taǧy bır maŋyzdy maqsat – şaǧyn jäne orta biznestı örkendetu. Oǧan memleket tarapynan barynşa qoldau körsetu kerek. Ūlttyq ekonomikany ärtaraptandyru – kezek küttırmeitın mındet. Şikızatqa täueldılıkten arylu üşın otandyq öndırıstıŋ jūmysyn jandandyru qajet. Būl – oŋai mäsele emes. Degenmen, ony basty nazarda ūstaimyz. Bız qolǧa alǧan saiasi reformalardy jalǧastyra beremız. Onsyz memleketımız damymaidy. Osy rette memlekettık basqaru jüiesınıŋ tiımdılıgın arttyru asa maŋyzdy. Bızge basşylardyŋ jaŋa buynyn tärbieleu kerek. Eldıŋ müddesın oilaityn mamandar bolmasa, bastamalarymyz nätijesın bermeidı. Osy tūrǧyda men ūsynǧan «Halyq ünıne qūlaq asatyn memleket» tūjyrymdamasynyŋ maŋyzy zor dep oilamyn. Jalpy, bız Elbasy maqūldaǧan Ūlt josparyn mındettı türde jüzege asyruymyz kerek. Būl – bügıngı zamannyŋ talaby. Mıne, bükıl elımızdıŋ aldynda tūrǧan osyndai mındetterdı oryndau üşın eŋ aldymen bilık tarmaqtary arasyndaǧy üilesım qajet. Maŋyzdy reformalardy jüzege asyruda Parlamenttıŋ, äsırese, Senattyŋ rölı de, qūzyretı de erekşe. Senattyŋ eŋ basty mındetı – sapaly zaŋdardy qabyldau. Mūndai zaŋdar reformalarǧa jol aşady, tūraqtylyq pen tärtıptı qamtamasyz etedı. Senat deputattary zaŋ jobalaryn talqylau kezınde nemese basqa formattaǧy basqosular barysynda qoǧamymyzdaǧy eŋ özektı, eldı alaŋdatatyn mäseleler jönınde ötkır oilar, syni pıkırler aituǧa qūqyly. Būl mäsele boiynşa dau joq. Būl rette, sızderdıŋ jūmystaryŋyz öte jauapty ekenın jaqsy bılemın. Özderıŋızge mälım, menıŋ jarlyǧymmen Senat deputaty Dariǧa Nūrsūltanqyzy Nazarbaevanyŋ ökılettıgı toqtatyldy. Ol Senat Töraǧasy retınde bır jyldan astam belsendı ärı jemıstı jūmys ıstedı. Sol üşın Dariǧa Nūrsūltanqyzyna rizaşylyǧymdy bıldırdım. Qūrmettı Senat deputattary! Menıŋ Jarlyǧymmen Mäulen Saǧathanūly Äşımbaev Senat deputaty bolyp taǧaiyndaldy. Konstitusiianyŋ 58-şı babynyŋ 1-şı tarmaǧyna säikes Parlament Senatynyŋ Töraǧasy lauazymyna Mäulen Saǧathanūly Äşımbaevtyŋ kandidaturasyn ūsynamyn. Ol memleket qyzmetınıŋ qyr-syryn jetık meŋgergen, ūzaq jyl türlı salada jemıstı jäne tiımdı jūmys atqardy. Parlament jūmysyn jaqsy bıledı. Ärdaiym özıne jüktelgen mındetterdı abyroimen atqaryp keledı. Memlekettık qyzmettegı täjıribesı mol. Sondyqtan, būl qyzmettı abyroimen atqaratynyna kümänım joq. Mäulen Saǧathanūly Äşımbaevtyŋ kandidaturasyn Senat Töraǧalyǧyna laiyqty dep sanaimyn. Qūrmettı deputattar! Barşamyz kürdelı kezeŋnen elımızdı aman-esen alyp şyǧu üşın jūmyla jūmys ısteuımız kerek. Ärdaiym baǧyt-baǧdarymyzdan jaŋylmai, alǧa batyl qadam jasaiyq. Jalpy, Senat deputattarynyŋ jūmysyna rizamyn. Bırlıgımız bekem bolsa, kez kelgen qiyndyqty eŋseremız. Barşaŋyzǧa zor densaulyq, baq-bereke, jūmystaryŋyzǧa jemıs tıleimın Rahmet!
