Álemniń tórt dúrkin chempıony jáne 2016 jylǵy Rıo Olımpıadasynyń altyn medal ıegeri kýbalyq Hýlıo Sesar la Krýs kez kelgen boksshymen judyryqtasýǵa daıyn ekenin málimdedi. Bul týraly AIBA Instagram jelisinde jazǵan bolatyn.
"Ataǵy mańyzdy emes. Rıngtegi óz deńgeıimdi tekserý úshin únemi myqtylarmen ǵana aıqasqym keledi", - deıdi La Krýs.
Áýesqoı boks tarıhynda, bizdiń Ádilbek Nııazymbetovtyń oń jambasyna bir kelmeı ketken osynaý ataqty boksshynyń esimi altyn áriptermen jazylary sózsiz.
Al, onyń joǵarydaǵy sózi jaıly: "Bul sózimen áıgili kýbalyq 21 jastaǵy Bekzat Nurdáýletovpen qarymtany meńzegen bolý kerek. Reseıde ótken álem chempıonatynda qazaq boksshy Olımpıada chempıonyn jeńip, sensaııa jasaǵan. Jartylaı fınalda Nurdáýletov kýbalyqty nokdaýnǵa túsirip, keıin 81 keli salmaqta altyndy da jeńip alǵan bolatyn", dep boljaıdy vesti.kz.
Ne bolsa da, Ýhannan taraǵan vırýstan zardap shekken álem esin jınap, ǵalamdyq karantın tártibi alynar bolsa aldaǵy jyl sport jankúıerleri úshin qyzyqty da tartymdy bolmaq.
Ularbek Dáleıuly
Foto: ınternet jelisinen
