QMDB koronavirus ındetı kezınde janaza jäne qūdaiy as ötkızuge qatysty mälımdeme jasady

Qazaqstan mūsylmandary dıni basqarmasynyŋ COVID-19 ındetı kezınde janaza jäne qūdaiy as ötkızuge qatysty mälımdemesı.

Asa raqymdy erekşe meiırımdı Allanyŋ atymen bastaimyz!

 

Qūrmettı otandastar, qadırlı bauyrlar!

Elımızdı dürlıktırgen ındettıŋ qaupı künnen-künge örşıp bara jatqany özderıŋızge mälım. Auru aityp kelmeidı. «Saqtansaŋ – saqtaimyn» demekşı, törtkül älemge qauıp töndırgen dertke nemqūrailyq tanytu – özımız üşın ǧana emes, janymyzdaǧy jandardyŋ ömırıne de äserın tigızerı haq. Osy oraida, Qazaqstan mūsylmandary dıni basqarmasy elımızdıŋ mūsylman qauymyn Janaza namazy men Qūdaiy astarǧa qatysudyŋ kelesıdei erejesın saqtauǧa ündeidı:

1. Janaza namazyna qatysty talaptardy oryndauǧa:

– Janaza namazyna bır ǧana dıni qyzmetkerdıŋ qatysuyna; – Janaza namazyna tek otbasy jäne jaqyn tumalarynyŋ qatysuyna; – Janazaǧa jalpy sany 30 kısıden artyq jinalmauǧa; – Boiynda dene qyzuy nemese jötelı bar kısınıŋ janaza namazyna mülde qatyspauyna; – Janaza namazyna keluşı kısı mındettı türde sanitarlyq normalardy (betperde taǧu, medisinalyq qolǧap kiiu jäne ekı metrden kem emes araqaşyqtyq) saqtauǧa;

• Indetten qaitys bolǧan mäiıttı därıgerdıŋ nūsqaulyǧyna sai juuǧa;

– Janaza namazy men uaǧyzdyŋ jalpy uaqytyn 5 minuttan asyrmauǧa; – Janaza namazy barysynda qol alysyp amandaspauǧa; – Janaza namazynyŋ sabyn tüzegende kemınde ekı metr qaşyqtyqty saqtauǧa; – Qabır basynda mäiıt jer qoinyna tapsyrylǧannan keiın jamaǧatty tezdetıp qaitaruǧa; – Jasy ülken kısıler, densaulyǧy naşar adamdar (er jäne äiel) jäne jas balalar janaza namazdaryna qatyspauǧa; – Qonaq asyn ötkızbeuge; – Janazadan keiıngı asty ötkızbeuge nemese otbasy müşelerımen şekteluge.  

2. Qūdaiy astarǧa (jetısı, qyrqy, jüzı, jyly jäne taǧy basqa) qatysty talaptardy oryndauǧa:

– Astardy ötkızbeuge nemese otbasy müşelerı, jaqyn tumalarymen şekteluge; – Bır ǧana dıni qyzmetkerdıŋ qatysuyna; – Sanitarlyq normalardy (betperde taǧu, medisinalyq qolǧap kiiu jäne araqaşyqtyq) saqtauǧa.  

Qūrmettı jamaǧat!

Alla Taǧala qasiettı Qūranda: «Öz-özderıŋdı öz qoldaryŋmen qauıp-qaterge salmaŋdar», – dep eskertedı. Öz ömırımız ben densaulyǧymyz – Alla Taǧalanyŋ bızge bergen amanaty. Alla Elşısı (oǧan Allanyŋ salauaty men sälemı bolsyn) özınıŋ bır ösietınde adam balasynyŋ özıne de, özgege de ziian keltıruıne qataŋ türde tyiym salǧan. Şariǧatta qandaida jūqpaly aurudyŋ belgısı taraǧan kezde aurudyŋ etek aluyn toqtatuda karantin qajet ekenı atap aitylǧan. Sondyqtan qazırgıdei közge körınbeitın ziiandy dert taraǧan kezde onyŋ aldyn alu – ärbır mūsylman balasy üşın mındet.  

Qūrmettı, otandastar!

Sızde jötel paida bolyp, boiyŋyzda dene qyzuynyŋ joǧarylauy baiqalsa nemese tynys alu qiynǧa soqqan jaǧdaida der kezınde därıgerge jügınuge, sondai-aq, qoǧamdyq oryndarǧa, tıptı meşıtke keludı toqtatyp, qūlşylyqtaryŋyzdy üilerıŋızde oryndauǧa keŋes beremız! Alla Taǧala elımızdı, halqymyzdy türlı auru-syrqaudan saqtaǧai! Äumin!  

"Adyrna" ūlttyq portaly