21 mausym men 1 şılde aralyǧynda elımız boiynşa Ūlttyq bıryŋǧai testıleu ötkızıldı. Biyl testıleuge qatysuǧa rekordtyq kölemde ötınışter qabyldandy: 131 754 ötınış tırkeldı, onyŋ 111 113-ı, iaǧni 82 paiyzy biylǧy mektep tülekterı. Ötken jyly būl körsetkış 12%-ǧa tömen bolǧan. Būl turaly "Adyrna" Bılım jäne ǧylym ministrlıgıne sılteme jasap habarlaidy.
2020 jylǧy Ūlttyq bıryŋǧai testıleu 161 punktte jürgızıldı. Testıleudıŋ ädıl ötkızılu barysyn qadaǧalau maqsatynda qalalar men öŋırlerge Bılım jäne ǧylym ministrlıgı tarapynan 1 983 ökıl jıberıldı. Sonymen qatar ŪBT barysyn qūramyna Sybailas jemqorlyqqa qarsy agenttık, Ükımettık emes ūiym, BAQ, «Adaldyq alaŋy» jobalyq keŋselerınıŋ ökılderı men qoǧam belsendılerı kırgen Arnaiy monitoringtık topqa müşe 510 adam baqylady.
Mausym aiynda ötkızılgen Ūlttyq bıryŋǧai testıleudıŋ qorytyndysy boiynşa, testıleuge tırkelgen azamattardyŋ 92,1%-y ŪBT-ǧa qatysty, 2019 jyly būl körsetkış 94%-dy qūraǧan bolatyn. Şektık baldy jinaǧan talapkerler sany – 82 154, būl ötken jylǧy körsetkıştermen salystyrǧanda bır deŋgeide qalyp otyr. Jalpy respublika boiynşa ortaşa körsetkış 64,06 baldy qūrady, jalpy 2019 jylǧy ortaşa körsetkışpen salystyrǧanda aitarlyqtai aiyrmaşylyq joq (65,5 ball).
Biyl alǧaş ret elektrondyq ükımet bazasy arqyly Face ID jüiesı paidalanyldy, osyǧan bailanysty ŪBT tapsyruǧa basqa adamnyŋ kıruı äreketterınıŋ sany aitarlyqtai tömendedı. Mäselen, biyl 7 mektep tülegı öz ornyna ŪBT-ǧa basqa adamdy jıbermek bolǧan, ötken jyly mūndai 34 jaǧdai oryn alǧan edı.
119 testılenuşı densaulyǧyna bailanysty ŪBT tapsyrmady. Olar üşın basqa künderı, 19 şıldege deiın testıleu ūiymdastyrylatyn bolady.
Biyl alǧaş ret talapkerler üşın kalkuliatorlardy paidalanuǧa rūqsat etıldı, testıleu uaqyty ūzartylyp, tülekter qorytyndy mektep emtihandarynan bosatyldy.
ŪBT jürgızılgen är auditoriia arnaiy beinebaqylau kameralarymen jabdyqtalǧan bolatyn, nätijesınde 9,5 mln-nan astam adam ŪBT-nyŋ ötkızılu barysyn onlain rejimde baqylady. Endı erejege säikes 2020 jylǧy 25 tamyzǧa deiın beinejazbalar jıtı tekserıledı. Eger beinejazbada grant ielengen talapkerdıŋ tyiym salynǧan zattardy paidalanǧany anyqtalsa, testılenuşınıŋ ŪBT nätijesı joiylady.
Elımızdıŋ barlyq ŪBT ötkızu punkterınde saqtyq şaralary qolǧa alynyp, medisinalyq-sanitarlyq normalar qataŋ saqtalǧan bolatyn. Ärbır ŪBT-ǧa qatysuşy dezinfeksiialaudyŋ 5 kezeŋınen öttı: dezinfeksiialyq ötkelderden ötıp, dezinfeksiialanǧan kılemşede aiaq kiımderın zararsyzdandyrdy, dene qyzuyn ölşetkızıp, qoldaryn zararsyzdandyru sūiyqtyǧymen öŋdedı jäne bırneşe medisinalyq maskalar aldy.
Testıleuge kırgızu jäne otyrǧyzu kezınde talapkerler arasynda kem degende ekı metr araqaşyqtyq saqtaldy. Ärbır auditoriia bakterisidtık qūraldarmen jäne aua resirkuliatorlarymen kezeŋ-kezeŋmen jeldetılıp, tazalandy. Auditoriialar 35%-ǧa deiın toltyryldy, ärqaisysynda tek 10-18 adam otyrdy. Ötken jyly bır auditoriiada ortaşa eseppen 50 talapker bolǧan.
Jalpy, mausym aiyndaǧy Ūlttyq bıryŋǧai testıleu qalypty rejimde öttı.
Esterıŋızge sala keteiık, kelesı ŪBT tamyz aiynda ötedı, onyŋ nätijesı boiynşa talapker şektık ball jinasa, JOO-nyŋ aqyly bölımıne tüse alady. Sonymen qatar joǧary oqu ornynyŋ aqyly bölımıne tüsu üşın qaŋtar aiyndaǧy ŪBT sertifikattary da jaramdy.
"Adyrna" ūlttyq portaly
