Auyt Mūqibek: Bügıngı qaraly kün – eŋ soŋǧy Jalpyūlttyq aza tūtu künı bolsyn dep tıleiık

NŪR-SŪLTAN. QazAqparat – Qoǧam qairatkerı, QR Prezidentı janyndaǧy Ūlttyq qoǧamdyq senım keŋesınıŋ müşesı Auyt Mūqibek koronavirus infeksiiasynan köz jūmǧan marqūmdardyŋ otbasyna köŋıl aitty, dep habarlaidy QazAqparat tılşısı. «Ne aitarymdy bılmeimın, bıraq erteŋnen ümıtım zor! Apat aityp kelmeidı eken. Şyn mänısınde, būl – üşınşı düniejüzılık soǧys! «Ajal oǧy qai jaǧymyzdan kelıp, jalpamyzdan tüsıredı?» degen ürei bükıl adamzat balasynyŋ miyn torlap alǧan. Qymbatty menıŋ qandastarym! «Qyryq jyl qyrǧyn bolsa da ajaldy öledı» degen söz bar. Qanşama bozdaqtarymyzdan, jaqsylarymyzdan aiyrylyp jatyrmyz?! Öte ökınıştı jaǧdai», - dep jazdy Auyt Mūqibek Facebook paraqşasynda. Ūlttyq qoǧamdyq senım keŋesınıŋ müşesı marqūmdardyŋ otbasynyŋ qaiǧysyna ortaqtasyp, köŋıl aitty. «Alla olardyŋ jatqan jerın jaily, imanyn salamat qylsyn! Artynda qalǧan el-jūrty aman bolsyn! Būl – eŋ soŋǧy Ūlttyq aza tūtu künı bolsyn dep tıleiık aǧaiyn! Auyryp jatqan aǧaiynǧa küş-quat tıleimın. Qairatty bolyŋyzdar, sauyǧyp ketesızder. Aman bolaiyq!» - dep tüidı Auyt Mūqibek. Aita ketsek, elımızde qalyptasqan ahualǧa bailanysty halyqqa ündeu jasaǧan QR Prezidentı Qasym-Jomart Toqaev 13 şıldenı – Ūlttyq aza tūtu künı dep jariialaityny turaly mälım etken bolatyn. Tiıstı ökımge Memleket basşysy kelesı künı qol qoidy. Qazaqstanda koronavirus pandemiiasynyŋ qūrbany bolǧan azamattardy eske aluǧa bailanysty bügın - Jalpyūlttyq aza tūtu künı.