Būl turaly qala äkımınıŋ orynbasary Aibek Sättıbaev şahardy sifrlandyru boiynşa ötken jinalysta qala äkımı Mūrat Äitenovke baiandady.
Äkımnıŋ tapsyrmasyna säikes qalalyq jer qatynastary basqarmasy bailanys antennalaryn ornatu üşın 11 jer telımın bölıp, olardy zaŋdastyru turaly qauly şyǧardy.
A.Sättıbaevtyŋ aituynşa, bailanys antennasyn ornatudy investor öz esebınen jürgızedı. Odan ärı ūialy bailanys operatorlary özderınıŋ bazalyq stansiialaryn osy qūrylǧyǧa jalǧaidy.
«Energetika jäne tūrǧyn üi-kommunaldyq şaruaşylyq basqarmasyna tiesılı jaryqtandyru baǧandaryna mobildı operatorlardyŋ bazalyq stansiialaryn investor ornatatyn neǧūrlym tūraqty baǧandarǧa auystyrudy ūsynamyz. Atap aitqanda, jük kötergıştıgı 1.5 - 2 tonna bolady. Bıreuınıŋ qūny şamamen 2 – 2,7 mln. teŋgenı qūraidy. Būl jobany jüzege asyru üşın arnaiy jol kartasy jasaldy», - dedı äkım orynbasary.
Sondai-aq, mobildı internet pen bailanystyŋ sapasyn jaqsartu şeŋberınde sifrlyq damu, innovasiialar jäne aeroǧaryş önerkäsıbı ministrlıgınıŋ ökılderı Şymkentte ūialy bailanystyŋ naşar aimaqtaryn, iaǧni ölı aimaqtardy anyqtau boiynşa jūmys jürgızdı.
Sonymen qatar, osy jabdyqty ornatu üşın 43 mekenjai körsetılgen jol kartasy daiyndaldy.
Aita ketu kerek, būl uchaskeler ūialy bailanys operatorlarynyŋ statistikasy men qala qūrylysynyŋ erekşelıkterın eskerusız qala köşelerındegı draiv-test nätijelerı boiynşa anyqtalǧan.
Būdan basqa, zertteu jürgızu jäne bazalyq stansiialardy ornatu maqsatynda arnaiy top qūryldy. Top jūmysyna sifrlandyru basqarmasynyŋ, jer qatynastary basqarmasynyŋ ökılderı, sondai-aq 43 jer uchaskesınıŋ ärqaisysynan bailanys operatorlarynyŋ mamandary tartyldy.
Sala mamandardyŋ mälımetınşe, köptegen problemalar üi-jailardyŋ ışınde qyzmetterdı paidalanu kezınde, tūrǧyn üi keşenderıne tıkelei jaqyn jerde bazalyq stansiialar bolmaǧan kezde tuyndaitynyn aituda.
Atqarylyp jatqan jūmystardy tyŋdaǧan qala basşysy jauapty mamandarǧa tiıstı tapsyrmalar jüktedı.
Şymkent qalasy äkımınıŋ baspasöz qyzmetı
