Nur-Sultan qalasynyń Álimhan Ermekov kóshesimen kele jatyp, ishim ýdaı ashyp ketti. 1919-1920 jyldary aralyǵynda Qazaq eliniń shekarasynyń bekitilýine asa kóp úles qosqan matematık, Alashorda ókimetiniń alǵyr da, zerek múshesi, kórnekti memleket qaıratkeri, Qazaqtyń mańdaıyna bitken birtýar uly Álimhan Ermekovke kólemi bir qulash qana kósheni bere salypty. Mynaý degeniń árýaq aldynda qylmys qoı dep ózimnen ózim tarylyp kettim. Bul tarıhı tulǵa óziniń jap jas shaǵynan bastap Álıhan Bókeıhannyń janynda qalmaı júrgen. Álıhan da bul jas jigitti zerektigi men alǵyrlyǵyn tereń tanyp, memlekettiń eń mańyzdy sharýalaryna atsalysý úshin janynan tastamaǵan. Álimhan Ermekov óte jas kezinen bastap memleket pen ókimettiń sharýalaryna aralasyp, ábden ysylyp, jas shaǵynyń kezinen ózdiginen memlekettik deńgeıde sheshim shyǵaratyn tulǵa bolyp qalyptasty. Onyń Qazaq eliniń shekarasyn bekitýde Lenınmen, Kalınınmen, Enýkıdzemen otyryp talqylǵan kezindegi Qazaq eliniń jer kólemi 3 mıllıon 467 myń 922 sharshy shaqyrym bolyp kórsetilipti. Al qazirgi Qazaq jeri osy jerdiń 69 paıyzyn quraıdy. Bizliń 31 paıyz jerimiz qoldy bolyp ketti. Sonda bizdiń qanshama mıllıon shaqyrym jerlerimiz jattyń qolynda ketkenin esepteı berińiz. Nebári 29 jasynda ulty úshin uly isterge ómirin arnaǵan Álimhan Ermekovke Qazaqtyń elordasynda durys kóshe buıyrmapty. Jalpy, Qazaq jeriniń shekarasyn bekitýde eń kóp úles qosqan tarıhı tulǵalar 20 ǵasyrdyń basynda Álıhan Bókeıhan, Ahmet Baıtursynuly, Álimhan Ermekov úsheýi bolǵanyn urpaq bilse eken... Bular ulylar. Ulylar eshqashan da umytylmaıdy. Qazaqtyń taǵdyryn arqasyna arqalaǵan tarıhı azamatqa bul kósheni qalaı berip otyr eken, túsinýge mıym jetpeı tur...
Bekbolat QARJAN,
"Adyrna" ulttyq portaly
