Küz jäne qys mezgılderınde adamdar arasynda virustyq infeksiialyq aurular jiıleidı. Osy oraida QR DSM Qoǧamdyq densaulyq saqtau ūlttyq ortalyǧy jūqpaly aurulardyŋ aldyn alu departamentınıŋ direktory Jūmabek Bekenov QazAqparat tılşısıne bergen sūhbatynda virustyq infeksiialardyŋ aldyn alu şaralary turaly aityp berdı.
«Virustardyŋ barlyǧy negızınen aua-tamşy joldary arqyly taralady. Onyŋ aldyn alu şaralaryna gigiena saqtau, salauatty ömır saltyn ūstanu, dūrys tamaqtanu jatady. Köşede, qoǧamdyq kölıkterde jäne basqa jerlerde maska kiıŋız, ony 2-3 saǧat saiyn auystyryp otyryŋyz. Sonymen qatar, bölmenı jiı jeldetıp, auany ylǧaldandyru qajet. Tüskı uaqytta taza auada seruendeuge şyqqan öte paidaly. Mūryndy jäne auyz quysyn tūzdy erıtındımen şaiyp, su, tättı emes şyryndar men şaidy köbırek ışken jön. Al özıŋızdı qorǧaudyŋ eŋ senımdı ädısı – tūmauǧa qarsy ekpe saldyru. Vaksina jasasaŋyz, boiyŋyzda virusqa qarsy antideneler paida bolady. Tūmauǧa qarsy mausymdyq vaksinalardy öndıruşıler jyl saiyn DDŪ ūsynysy boiynşa ekpenıŋ qūramyn özgertıp, mausymdyq tūmaudyŋ mutasiialyq türıne beiımdeidı. Ekpenı därı-därmekke allergiiasy bar adamdardan basqalarynyŋ barlyǧy alǧan jön. Kışkentai balalar, sozylmaly auruy bar azamattar, qarttar men jüktı äielder vaksinasiia jasauy qajet», - dedı QR DSM Qoǧamdyq densaulyq saqtau ūlttyq ortalyǧy jūqpaly aurulardyŋ aldyn alu departamentınıŋ direktory Jūmabek Bekenov.
