Jemqorlyq qylmysyn jasap, şetelge qaşyp ketken QR Auyl şaruaşylyǧy ministrlıgı «Kazvodhoz» RMK-nyŋ Aqmola filialy direktorynyŋ būrynǧy orynbasary öz erkımen elge oralmaq. Būl turaly bügın onlain rejimde ötken brifingte oblystyq Sybailas jemqorlyqqa qarsy ıs-qimyl departamentınıŋ basşysy Mūrat Töleubaev aitty, dep habarlaidy QazAqparat portaly.
Vedomstvo basşysynyŋ aituynşa, oblystyŋ jemqorlyqqa qarsy qyzmetı ärtürlı jazaǧa tartylǧan QR AŞM «Kazvodhoz» RMK-nyŋ bırqatar lauazymdy tūlǧasyna qatysty sotqa deiıngı tergeudı aiaqtady.
Osy rette, atalmyş käsıporynnyŋ Aqmola oblystyq filialy direktorynyŋ orynbasary sotqa deiıngı tergeu şaralarynan qaşyp, AQŞ aumaǧyna jasyrynǧan bolatyn. Oǧan halyqaralyq ızdeu jariialandy.
«Jemqorlyqqa qarsy qyzmettıŋ qyzmetkerlerı ızdeude jürgen adamnyŋ tuystarymen jürgızgen tüsındıru jūmystarynyŋ nätijesınde küdıktı biylǧy 21 tamyzda keltırgen şyǧyndy, iaǧni 46 187 614 teŋgenı tolyǧymen ötedı. Sonymen bırge, ol Qazaqstan Respublikasyna qaityp keluge daiyn ekenın jetkızdı», – dep atap öttı Mūrat Töleubaev.
