Búgin, ıaǵnı 13 qyrkúıek - qazaq boksyna bir kisideı eńbegi sińgen bapker Myrzaǵalı Aıtjanovtyń týǵan kúni. "Adyrna" Ulttyq portalynyń ujymy dańqty bapkerdi týǵan kúnimen quttyqtaı otyryp, uzaq ǵumyr, jemisti eńbek tileıdi.
2013-2014 jyldardyń qorytyndysy boıynsha dúnıe júziniń eki márte eń úzdik jattyqtyrýshysy atanǵan jalǵyz qazaq bapkeri. 2009-2018 jyldary Qazaqstan quramasynyń bas bapkeri boldy. Álem chempıondary Qaırat Erálıev pen Birjan Jaqypovtyń, Olımpıada oıyndary men álem chempıonatynyń qola júldegeri Erkebulan Shynálıevtiń, álem chempıonatynyń medalısi Sáken Bıbosynovtyń jáne Azııa chempıony Bek Nurmaǵanbettiń bapkeri.
2009 jyldyń kúzinde Qazaq eli quramasynyń bas bapkeri qyzmetine taǵaıyndalǵan Myrzaǵalı Qulanuly 60 jyldyq tamasha dástúri bar respýblıka boksyn jańa beleske kóterýge bilek sybana kiristi. 2013 jyly qazaq jigitteri álem chempıonatynda buryn-sońdy bolmaǵan asýǵa taban tiredi. Almatydaǵy álemdik birinshilikte bizdiń boksshylar 4 altyn, 2 kúmis, 2 qola medaldi enshilep, dúnıe júzi boıynsha komandalyq esepte 1-oryndy jeńip aldy. Osy jyly Myrzaǵalıdyń komandasy Iordanııada bolǵan Azııa chempıonatynda 7 «altyndy» oljalaǵan edi. Bul - qazaq quramasynyń Azııa chempıonattaryndaǵy rekordtyq nátıjesi bolatyn.
2013 jyldyń qorytyndysy boıynsha Myrzaǵalı Aıtjanov 196 memlekettiń boks federaııasyn biriktiretin AIBA-nyń uıǵarýymen jumyr jerdiń eń tańdaýly jattyqtyrýshysy mártebesine ıe bolsa, Danııar Eleýsinov álemniń eń úzdik boksshysy atandy.
Myrzaǵalı baptaǵan qurama 2014 jyly Inchhondaǵy Azııa oıyndarynda da rekordtyq beleske ıek artty. Buǵan deıingi bes Azııa oıyndarynda úsh altyn medaldan artyq oljalap kórmegen qazaq boksshylary osy joly 6 altyn júldeni qanjyǵaǵa baılady. On salmaqtyń altaýynda qazaqtar top jardy! Azııa qurlyǵynda 40-tan astam el baryn eskersek, bul degenińiz talaı alpaýyt memleketterdiń túsine de kirmeıtin jetistik. Osyndaı rekordtyq jeńistiń nátıjesinde jáne álemdik reıtıngte B. Jaqypov, D. Eleýsinov, J. Álimhanuly, I. Dychko sekildi shákirtteri jeke-dara kósh bastap, buǵan qosa taǵy úsh-tórt sportshysy úzdik úshtikke engen Myrzaǵalı Aıtjanov 2014 jyldyń sońynda álemniń eń úzdik jattyqtyrýshysy ataǵyna ekinshi márte ıe boldy. Endeshe, Qazaqstan sportynyń tarıhynda eki jyl qatarynan jer sharynyń eń úzdik jattyqtyrýshysy atanǵan jalǵyz maman - Myrzaǵalı Aıtjanov ekenin hatqa túsirip qoıǵanymyz artyq bolmas.
Materıal avtordyń facebook paraqshasynan
Sýret ashyq derekkózden alyndy
