Şökeevtıŋ küieubalasy ormannyŋ oiranyn şyǧaryp, ormanşylardy şulatuda ma? VİDEO

Türkıstan oblysynda qoryqşylar osylai dep şu şyǧardy, dep habarlaidy Dalanews.kz KTK telearnasyna sılteme jasap. Syrdariia-Türkıstan memlekettık öŋırlık tabiǧi parkınde ekı jyldan berı qyzmet pen erekşe qorǧaluy tiıs aǧaştardyŋ saudasy qyzǧan. “Al olarǧa tosqauyl bolatyn qūzyrly organ küngeide joq”, – deidı ormanşylar. Sebebı, park basşysynyŋ orynbasary oblys äkımı Ömırzaq Şökeevtıŋ küieu balasy bolsa, park filialynyŋ direktory qazırgı Sozaq audany äkımınıŋ ūly. Aty atalǧan ekeuı mūny joqqa şyǧardy. Abylaihan Şaldarov üş jyl būl baqta ormanşy bolǧan. Aituynşa, mūndaǧy Qyzyl kıtapqa engen toraŋǧyl men jide aǧaştary jappai qyrqylyp jatyr. Toǧaidy qorǧauy tiıs inspektorlar basşylardyŋ pärmenımen aǧaş saudagerıne ainalǧanyn aitqany üşın jyl basynda jūmystan ketıptı. Syrdariia-Türkıstan memlekettık öŋırlık tabiǧi parkı basşysynyŋ orynbasary men park filialy direktory kelgelı “ömırımız, tıptı tozaqqa ainaldy” dep küiınedı ol. Abylaihan Şaldarov, būrynǧy ormanşy: – 2018 jyldan berı osy ekı kısı keldı. Polatov Nūrjan men Äbdıqadyrov Aqyl degen. Ylǧi sonymen qyz äkep demalady. Bızdı şaqyryp alady: “Oibai, tez, qoi äkelıŋder, myna jerge şaşlyk ısteuımız kerek. Koniak, kalian şeguımız kerek”. Äkelmeseŋ, ertesıne senı zaŋmen jūmystan şyǧarady. Ormannan aqşa jasaudyŋ täsılı köp eken. “Gazy joq, qysta kömırı qymbat Otyrar audanynda bır arba ǧana otyn satuǧa rūqsat beretın biletpen 100 arba otyn satylady”, – deidı būrynǧy qoryqşylar. Otyndy bylai qoiǧanda, Otyrarda jide men toraŋǧyldy qada qylyp, biznes jasau ürdısı bar. Bır ǧana jide taldan 7 qada jasauǧa bolady. Qada degenıŋız, kesılıp daiyndalǧan börene. Jergılıktı qara bazarda bır ǧana qadanyŋ baǧasy – 400 teŋge. Sonyŋ saldarynan erekşe qorǧalyp, jaiqaluy tiıs orman qyp-qyzyl bizneske ainalyp, jaipalyp barady. “Är tüsken teŋgenı aǧa ormanşynyŋ qaltasyna basyp, odan qalsa, Nūrjan Polatov pen Aqyl Äbdıqadyrovtyŋ jynoinaǧyna salamyz” – dep aşynǧan ormanşylar osyny basşylarǧa aityp, basy bälege qalǧan. Abylaihan Şaldarov, būrynǧy ormanşy: – “E, mynau ne desem», Nūrjan Polatovtyŋ aituy: «Oibai, Abylai, senıŋ şaruaŋ bolmasyn, myna jūmystan ket, men senı ıstetpeimın, şyq, boldy, ary qarai eŋbek qorǧau bölımıne jazasyŋ ba, qarjy polisiiasyna jazasyŋ ba, prokuraturaǧa jazasyŋ ba, men özım şeşıp alamyn”. “Qazır, Abylai, tanys şeşedı”. Aqyldyŋ aituy da sol: “Menıŋ qaiyn aǧam tūrǧanda, eşkım eşteŋe ıstei almaidy” – deidı. Syrdariia-Türkıstan saiabaǧy basşysynyŋ orynbasary Aqyl Äbdıqadyrov degen oblys basşysy Ömırzaq Şökeevtıŋ tuǧan küieu balasy, al filial direktory Nūrjan Polatov Otyrar audanyna talai jyl äkım bolǧan, qazır Sozaq audanynyŋ äkımı Salyhan Polatovtyŋ ūly. Parktegı bylyqty äşkereleu üşın būrynǧy ormanşylar men audan tūrǧyndary biyl polisiia men aumaqtyq inspeksiia ökılderın ertıp reid jasaǧan eken. “Jüzdegen aǧaştyŋ şabylǧany anyqtalǧanymen, sol küiı şara qoldanylmady” – deidı tūrǧyndar. Beibıt Syzdyqov, Otyrar audanynyŋ tūrǧyny: – Oblys prokuroryna, bıraq oblys prokurory tabiǧatty qorǧau prokuroryna jıberdı, tabiǧatty qorǧau prokurory komitetke jıberdı, komitet Qalymbetovke jıberdı, qaityp Qaiyrbekovke keldı. Sonymen, ne tekserılmeidı, ne qoimaidy. Saiabaqty sauyq-sairan ornyna ainaldyrdy dep aiyptalǧan basşylardy ızdep Türkıstanǧa bardyq. Nūrjan Polatov ornynda joq. Hatşysy onyŋ syrqattanǧanyn aitsa, qyzmetkerı “jūmys babymen reidte jür” dep şatasty. Esesıne, oblys äkımı Ömırzaq Şökeevtıŋ küieu balasy kezdesuden qaşpady. “Ormanşylardyŋ özı qylmyspen ainalysyp jürgen soŋ, qyzmetke kele sala, tärtıpke keltıremız dep, ūnamai qaldyq”- deidı Aqyl Äbdıqadyrov. Aqyl Äbdıqadyrov, Syrdariia-Türkıstan memlekettık öŋırlık tabiǧi parkı KMM bas direktorynyŋ orynbasary: – Aǧaş şaptyru,demalu, qoi soidyru dei me… – Qyzdarmen demalu degen siiaqty… – Joq, qyzdar joq ol jerde. Sonyŋ bärı jala. Öitkenı ondai tırlık bolmaǧan. Jala-jabu, ar-namys taptau köp qoi ol jerde. Özımız ol jerde zaŋmen şeşemız ǧoi. Basşy endı öz qyzmetkerlerın sotqa bermekşı. Al “qai jaqqa jazsaq ta, ädıldık tappadyq” degen ormanşylar Türkıstan oblysynda toǧaida bolyp jatqan köleŋkelı bizneske tosqauyl qoiar eşkımnıŋ joǧyna senımdı. Sondyqtan astanadaǧylar körıp, aq-qarasyn aitar dep ümıttenedı. https://www.youtube.com/watch?v=oiXFYqId8nM&feature=emb_title