Atyraý oblysy, Jylyoı aýdanynyń halqynan maza ketti. Kóktemnen beri sozylǵan karantın jurttyń kúnkórisin turalatyp, ábden qıyndatqan. Osyǵan baılanysty aýdan halqy Facebook-taǵy «Aıtarym bar» tobynda ákim Halel JAMALOVQA úndeý tastap, máseleni sheship berýdi surady.
Karantınge baılanysty «Teńiz» munaı- gaz óndirý ken ornynda sáýir aıynan beri jumys toqtady. Sáýir, mamyr, maýsym aılarynda keıbir mekemeler jumysshylaryna jalaqy tólegen. Al sońǵy úsh aıdan beri bul aýdannyń jumysshylar ne aılyq joq, ne jumys joq daǵdaryp otyrǵan jaıy bar. Osyǵan baılanysty «Aıtarym bar» tobynda úndeý tastaǵan Sarman MÁLIKTIŃ jazýynsha, «Teńizde» jumys isteý - túbinde ómir súrip jatqan eldimeken turǵyndaryna buıyra bermeıtin kórinedi.
«Halyq qashanǵy jumyssyz júre bermek. Qaı topty oqysań da, jergiliktilerdi almaıdy «Teńizge», basqa jaqtardan kelip jumys istep jatqandar dep kúıinip aıtyp otyrǵandar bar. Rasynda, nege jergiliktiler óz jerimizde óz «Teńizimizge» jumysqa kire almaımyz, nelikten?
Basqa jaqtaǵylar qalaı jumysqa kirip jatyr, bul jerde jemqorlyq oryn alyp turǵan syńaıly emes pe, degen oı keledi.
Jumyssyz jergiliktilerdiń beretin aqshalary joq, sondyqtan jumysqa shaqyrmaı ma? Bul qalaı bolǵany, mańdaıymyz tirelip turǵan «Teńizge» nege jumysqa bara almaımyz?
Men aýdan əkimdiginiń qabyldaýyna kirgenimde de, osy məseleni qozǵaǵan bolatynmyn.
«Sheshiledi, jergiliktilerdi ornalastyratyn bolamyz» degen qur ýədelerińizdi halyqty aldarqatqandaı nege aıttyńyzdar!
Aýdan basshysynyń osyndaı keleńsizdikti joıýyna ne kedergi keltirip tur?
Qashanǵy kútýge bolady?» - dep jazady Sarman Málik.
Munaı-gaz óndiretin «Teńiz» ken ornyna sol aımaqta turatyn azamattardy jumysqa almaýdyń astarynda ne jatyr? Alyp ken ornynyń túbinde turatyn halyq joq-jitikten zardap shegip jatqanda, osy aýdannyń ákimi ne sebepten bul máseleni sheshýge at salyspaıdy?
«Jumys kerek, otbasymyzdyń kúnkórisi nasharlady» dep shyryldaǵan Jylyoı aýdany halqynyń janaıqaıyn estir qulaq tabylyp, kómek qoly sozyla ma? Aýdan halqynyń ákim Jamalov Halel myrzadan suraıtyny - «Teńizdegi» jumysyna azamattar qaıta oralsa jáne «Teńizdegi» jumysqa eń aldymen osy jerdegi azamattar alynsa degen ótinish. Jergilikti bılik ókilderi halqynyń suraýy men úndeýin nazardan tys qaldyrmaıdy dep senemiz.
Muhıt ShOQAN,
«Adyrna» ulttyq portaly.
Foto ashyq derekkózden alyndy
